Туй күлмәгеннән — сайлау участогына: Татарстанда яшь парлар сайлауда катнашты

Алар никахларын теркәде һәм шул ук көнне сайлау участокларына барып, IX чакырылыш Россия Дәүләт Думасына депутатлар сайлауда катнашты. Бу хакта безгә Татарстан Министрлар Кабинетының гражданлык хәле актларын теркәү Идарәсе хәбәр итте. 

Кемдер башта ЗАГСка, аннары сайлау участогына юл тоткан, ә кемдер, киресенчә, иң элек тавыш биреп, соңыннан никахлашу тантанасына киткән. Шулай итеп, яшьләрнең гаилә тормышы башланган көн сайлаулар белән дә бәйле истәлекле датага әверелгән.

Мәсәлән, Әлки районында Айнур Сибагатов белән Гөлназ Бәдретдинова никахларын теркәгән. Айнур әйтүенчә, теркәлү вакытын билгеләгәндә сайлауларның нәкъ шул көнне башланачагын белмәгәннәр. Соңрак моны ишеткәч, яшьләр сөенгән: киләчәктә балаларына «Дәүләт Думасына сайлаулар көнендә гаилә кордык» дип сөйләр өчен матур хатирә булачак.

Мамадышта Азат һәм Эльвира Нуриевлар да никахлашу тантанасыннан соң сайлау участогына юл тоткан. Алар өчен бу көн гаилә тарихының башлануы белән генә түгел, сайлауда катнашу белән дә истәлекле булган.

Бер көндә — ике зур вакыйга

Балтач районында Айнур Галимуллин белән Динара Нәбиева никахларын теркәгәннән соң 1093 нче сайлау участогына килгән. Яңа гаиләне ЗАГС хезмәткәрләре һәм сайлау комиссиясе әгъзалары котлаган.

Ә Чистайда Максим һәм Виктория туй тантанасыннан соң ук сайлау участогына килгән. Максим — махсус хәрби операциядә катнаша, хәзер ул ялда. Яшьләр бу көнне гаилә кору белән бергә гражданлык бурычын үтәү көне буларак та истә калдырырга теләгән.

Түбән Камадан Марат һәм Илгизә Гафиятовлар исә ЗАГСка барыр алдыннан 2823 нче сайлау участогында тавыш биргән. Тавыш биргәннән соң яшьләрне участок сайлау комиссиясе рәисе Светлана Симачкова котлап, аларга гаилә бәхете теләгән.

Азнакайда Лиана һәм Максим Маскевичлар сайлау участогына бәйрәмчә киемнәрдән килгән. Лиана туй күлмәгендә тавыш биргән. Яшь гаилә өчен бу көн, алар әйтүенчә, гомерлеккә истә калырлык матур хатирә булып калачак.

Түбән Камада Александр һәм Гөлнара Муравьевлар да никахлашу сараеннан соң сайлау участогына килгән. Алар өчен сайлауда катнашу гаилә тормышының беренче көненә туры килгән.

Бер көндә — никахлашу, беренче уртак карарлар һәм сайлауда катнашу. Яшь парлар өчен 18 сентябрь шулай итеп гаилә тарихларында аерым урын алып калачак.