Тычканнар, куяннар кышын җимеш агачларын кимермәсен дисәң...

Күп кенә бакчачылар агачларның кәүсәсен рубероид кебек караңгы төстәге материаллар белән кап­ламаска киңәш итә. Алар урынына чыршы ботакларын, металл челтәр, синтетик челтәр кулланырга куша. 
Чыршы ботагын энәләрен аска каратып бәйләргә кирәк. 

Арматур, штукатур челтәре шулай ук һава үткәрә, әмма аны агач кәүсәсенә бәйләү җайсыз, шуңа да ул киртә ролен генә үтәячәк. 
Синтетик челтәрнең ачык төстәгесен сайлагыз. Черкидән саклый торган сетка, иске тәрәзә челтәре дә ярап куя. Алар шпагат яки тимерчыбык ярдәмендә агачка тиз һәм җиңел беркетелә. Әмма артык калын итеп бәйләргә кирәкми, югыйсә агач кайрысы сулый алмый. 

Капрон оекларны шулай ук калын итеп бәйләмәгез, тик ачык урыннар калырга тиеш түгел. 

Пластик шешеләрне кисеп, бер-берсенә беркетеп, тимерчыбык белән бәйләгез.