“Янабыз, шалтыратыгыз”, – ди дә, балаларын уятып тәрәзәдән берәм-берәм урамга сикерәләр

– Кукмарадан күченеп кайттык без. Ирем белән аерылыштык. Бик ярата идек өебезне, иркен дә, зур да иде. Бакчасы да кыр кадәр. Бу казаны килер дип һич көтмәдек, ләкин, сизенгәндәй, гел ут-күздән саклана идек. Балалар төнлә уянгач курыкмасыннар дип утны да яндырып калдырмадым. 5 се көнне Адель урамнан кайткач, ишекне бикләгәнче бер кат бөтен җирне күзәтеп кердем әле. Олыраклары кич чыгып йә урам әйләнәләр, йә паркта сөйләшеп утыралар, Балалар унбиш минутлап телевизор карадылар да ун тулганда яттык без. Көннәр бик эссе, ул көнне үз алдына тынчу иде. Ашарга пешергәч, өй эче тагын да кызып китте. Башта балалар йоклый алмыйча боргаланышып яттылар да, күпмедер вакыттан соң сүнгәнбез. Черт-черт иткән тавышка уянып киттем. “Ишекне каералармы соң?” – дип уйлыйм, аңламыйм гына. Торып, йокы бүлмәсеннән зал ягына чыкканда тәрәзәдән ялкын яктылыгы күренде. Ипләбрәк карасам – сарай тәрәзәсендә ут дөрли. Кәгазь кебек чертләп яна... Әле түбәсенә күтәрелмәгән иде. Балалар йокласын, мин чыгып сүндерим, дип тә уйлыйм. Шул ук вакытта: “Әгәр хәлемнән килмәсә? Балаларны коткарырга кирәк”, – дип тә икеләнәм. Андый хәлдә нишләргә дә белмисең икән. Кемгә шалтыратырга икән, дип, телефоннан номер эзләп алҗыдым әле, – дип сөйли Гөлназ. 

Участок инспекторына хәбәр бирә: “Янабыз, шалтыратыгыз”, – ди дә, балаларын уятып, йокы бүлмәсендәге тәрәзәдән берәм-берәм урамга сикерәләр.

– Счетчикны барып сүндердем. Телефон белән балаларның документларның гына алдым. Кием дип тә, телевизор, компьютер алып чыгасы дип тә уйлый белмәгәнмен. Күршеләр йөгерешеп килделәр. Кайсы балаларга дип куртка алып чыккан, кайсысы кофталар, трусиктан гына чыккан балалар бит, киендердек. Энемнең аерылган хатынына шалтыраттым, аның да башыннан кичкән сынау. “Урам уртасында басып калдык, берәү дә сыендырмый...” – дидем. Үзенә дәште. Елашып барып кердек, – ди Гөлназ.

Ачыклык кертик, алты баланың дүртесе генә өйдә була. 17 яшьлек олы улы Булат бу төнне иренең әнисендә куна. Егетнең эшкә ялланып, акча эшләгән мәле. Тугызынчы сыйныфны бетергән кызы Индира да Кукмарада яши, иренең бертуган сеңлесендә торып укый ул. Гөлназ исә дәүләттән балага бирелгән тиешле пособиене, әйтүенчә, аңа җибәреп бара. Адель улы 7 нче сыйныфка күчкән. Игезәкләре Илмир белән Эмильгә – 9, Дәнискә 6 яшь. Гөлназ авылдагы бер әбинең опекуны булып рәсмиләштерелгән, айлык 2 500 сум хезмәт хакы ала. Авыл халкы сөйләвенчә, Гөлназ тормышны үзе генә тартса да балалары бик тәртипле, итәгатьлеләр, яхшы билгеләргә генә укыйлар икән. 

– 10 майда үрдәкләр алган идем, иткә тулдылар, өлгерделәр. Икесен суеп та караган идек. Калган 12 се, сарайдагы 2 кәҗә дә, 22 баш куяныбыз да, ике кышлык утыныбыз, узган елгыдан калган печәннәрем дә дөрләп яндылар. Өеп куелган тирескә кадәр көлгә әйләнгән. Газ кермәгән иде, торбасын капка төбенә кадәр китертә алдым да туктап калдым. Ишле гаиләдә акча җиткерүе кыен. Мунчага яңа мич куйдырган идем, торбаларына кадәр кадәр эрегән, шул тимер мич кенә утырып калган... Йортны иминиятләштермәгән идек, бик үкенәм шуңа. Дәүләттән дә ярдәм булмаячак. Әниләргә кайтып егылдык, нишлик. Бер түбә астында 8 җан...– ди Гөлназ. 

Алты балалы Гөлназ Рәхимуллина гаиләсе ярдәмгә мохтаҗ. Ярдәм итәргә теләүчеләр өчен улы Булат Рәхимуллинның банк картасы номеры – 2200 7008 4310 2822 (Тинькофф)