“2010 елгы җәй кабатлана дип борчылган идек”.Халык синоптигы фаразы

– Көзнең беренче ае гадәттәгедән җылырак булырга тиеш. Язның ничек килүенә карап, көзне билгелибез бит. Сентябрь март аена туры килә. Март исә көтелгәннән җылырак булды, – ди ул. 

Ә август ахырында, егермеләре тирәсендә, әле бер суытып алырга мөмкин икән. Сентябрьдә дә салкын көннәр булачак. 

–  Иске ай бетеп, яңасы туганда һава торышы бозылып ала. Августның егермеләре суытып алса, егерме тугыз көннән тагын шул кабатланачак. Менә шундый закончалык бар. Ай арасында суытып, яңгыр явып алу әйбәт анысы. Быел да 2010 елгы җәй кабатланырмы дип борчылган идек, үләннәр инде корып беттем дигәндә, әйбәт кенә явып китте. Игеннәр дә, печән дә күтәрелеп китте. Бәрәңгегә дә әйбәт булды. Без аны җир астында дым тоташты дибез. 2010 елда яңгырлар булмагач, астагы дым белән тоташа алмады. Җир астындагы дым парга әйләнеп беткән иде. Узган ел көзен яңгырлар явып торгач, җирдә дым күп булды. Шуның запасы коткарып калды, – дип аңлатты Әмир абый.  

Сентябрьгә яңгырлар буласына исә шикләнә. Март аенда күп яуганлыктан, башка айларга явым-төшемнәр бик калмый ди. 
Кышны да бик җылы булмас, хәтта нормадан салкынрак та булыр дип фаразлый. Монысын ул җәйне эссе килү белән бәйләп аңлата.