Яңа ел бәйрәмнәрендә Кукмарада итек атыш уйнап кайтыгыз

Сүз уңаеннан: бәйрәм көннәрендә республикага 150-160 мең турист килер дип көтелә. 

– Бөтен туристлык үзәкләре дә Яңа ел программасы әзерли, шул исәптән Кукмара районы да. Берничә ел рәттән уздырылып килә торган “Кукмара итекләре” фестивале дә туристлар арасында бик популяр. Бәйрәм чарасы буларак кына түгел, халык һөнәрчелеге белән танышу мөмкинлеге дә ул, – диде спикер. 
Кукмара районы башкарма комитеты җитәкчесе урынбасары Айгөл Әхмәтшина сүзләренчә, 4 һәм 5 гыйнвар көннәрендә узачак фестивальгә республика районнарыннан һәм казаннан гына түгел, күрше Киров өлкәсеннән, Мари Эльдән, Удмуртиядән дә киләләр. Башта район күләмендә оештырылса, 2025 елдан бөтенроссия фестивале статусында үтә. Тагын бер яңалыгы – элек ул бер генә көн оештырылган булса, Яңа елда ике көнгә сузылачак. 

Фестивальдә катнашучы командалар беренче көнне Кукмараның атаклы киез итек фабрикасында булачак. Итек басу буенча аларга мастер-класслар да оештырыла. 

– Алдан теркәлгән командалар иҗади чыгышлар белән һәм шулай ук спорт ярышларында көч сынашачак. Ярышлар барысы да итек белән бәйле булачак. Чарага җырчылар Марат Яруллин, Марина Карпова һәм “Кәрия-Зәкәрия” төркеме чыгыш ясар дип көтелә. Шунда ук ярминкәләр эшләячәк. Туристлар да читтә калмаячак, алар да төрле ярышлар һәм конкурсларда катнаша ала. 5 гыйнварда итек белән футбол ярышы да оештырыла. Анысына авылларда төпләнеп калган яшьләр катнаша, – дип фестиваль программасы белән таныштырды Айгөл Әхмәтшина.