«Салават Күпере»ндә яшьләр клубы, китапханә һәм ике «Ышаныч» үзәге ачылачак

Быел Казанның Киров районында яңа китапханә, балалар һәм яшүсмерләр өчен ике «Доверие» психологик-педагогик ярдәм үзәге һәм «Вертолет» яшьләр үзәге ачылачак. Бу хакта Казан мэры Илсур Метшинга Киров һәм Мәскәү районнары башлыгы Сергей Миронов хәбәр итте.

Яңа китапханә Салават Күперендә Арсланов урамы, 13 адресы буенча ачылачак. Ул бу торак районда беренче булачак. Китапханә ике катлы булачак, анда абонемент һәм уку залларын, шулай ук кечкенә конференцияләр залын үз эченә алган тыныч зона булдыру каралган. Төрле китапларның 70 мең данәсе сатып алынган инде.

«Доверие» үзәкләре шулай ук Салават Күперендә һәм Юдино микрорайонында ачылачак. Ел саен шәһәр буенча эшләүче мондый учреждениеләрдә 14 яшьтән 35 яшькә кадәрге 50 мең яшүсмер һәм яшь кеше психологик ярдәм ала.

Адмиралтия бистәсендәге «Вертолет» яшьләр үзәгенә 4 меңнән артык кеше килә алачак. Алар өчен төрле тематикадагы түгәрәкләр һәм секцияләр эшләячәк, дәресләр өчен тиздән заманча җиһазлар алып кайтачаклар, дип билгеләп үтте Сергей Миронов. Бинада элек Казан вертолет заводының мәдәният йорты урнашкан булган, шуңа күрә казанлыларга таныш булган беренчел кыяфәтне саклап калырга карар кылынган.

Моннан тыш, Адмиралтия бистәсендәге янгын депосы бинасында Пилотсыз очу аппаратлары үзәген урнаштыру планлаштырыла.

Исегезгә төшерәбез, узган ел Киров районының Юдино бистәсендә «Сәяхәт» өстәмә белем бирү үзәге ачылды. Анда 2400 гә кадәр бала һәм яшүсмер шөгыльләнә ала, шул исәптән сәламәтлек мөмкинлекләре чикләнгән балалар да. Техник, хореография түгәрәкләре, спорт секцияләре эшли.

Шушы көннәрдә Мәскәү районында, Короленко урамында, «Яратам» яшүсмерләр клубы ачылды. Яңа клубның түгәрәкләрендә һәм секцияләрендә 800 яшь казанлы шөгыльләнә алачак. Алар өчен хәзер программалаштыру, 3D-модельләштерү, робототехника буенча дәресләр үткәрелә. Үзәк Казанның «Подросток» яшьләр клублары челтәренең штаб-фатирына әвереләчәк, ул 18,8 мең яшь кешене берләштерә.

Узган ел капиталь ремонттан соң 2 нче балалар музыка мәктәбе һәм Баруди урамындагы 27 нче китапханә ачылды.