«Шушы спектакльдә уйнап, Тукай премиясе алдык»

Заманында Камал театры сәхнәсендә Әсәл ролендә - Наилә Гәрәева, Ильясны Ренат Таҗетдинов уйнаган иде. Шулай ук Шәүкәт Биктимеров, Шәхсәнәм Әсфәндиярова, Ирек Баһманов кебек күренекле артистларның уйнавы да истә әле. Билгеле, яңа гына профессиональ баскычка күтәрелеп килгән театр коллективы белән аларның уенын чагыштыру дөрес булмас иде.

Шофер егет Ильяс Әсәлгә бер күрүдә гашыйк була һәм алар гаилә корып җибәрәләр. Әмма аларның бер-берсен яратулары да гаиләне саклап калмый. Арада хыянәт булганда, мәхәббәт уты озак дөрли алмый шул. Иренең хыянәтен Әсәл кичерә алмый. Ул үзенең язмышын, юлында беренче очрап, аңа карата игътибарлы булган Байтимер белән бәйли. Тыйнак, чибәр, горур Әсәл ролен Гүзәл Гафарова башкарды. Аның образы аша бүген кайбер кызларда әнә шул сыйфатлар җитеп бетмәвен күрәсең. Фаяз Хөсәенов үз роле (Ильяс) белән тамашачыда нәфрәт уятса да, уйнавы белән сөендерә. Югалтканнан соң гына ул үзенең сөюен аңлый. Байтимерне гәүдәләндергән Айдар Вәлиев үзенең олы җанлы булуына тамашачыны да ышандырды. Зөһрә Мөхәммәтшинаны үз бәхете өчен көрәшә белгән хатын-кыз ролендә күрдек. Аның Ильяс өчен өзгәләнүләре беркемне дә битараф калдырмый. Ләкин ике яклы мәхәббәт нигезендә корылмаган гаилә тотрыклы булып чыкмый. Зөһрә моннан берничә ел элек Илдар Хәйруллин курсында белем алган иде. Әлеге роле өчен ул быел «Тантана» премиясенә дә лаек булды. Татарстанның атказанган артисты Марат Хәбибуллин теләсә кайсы рольдә дә үзен оста башкаручы буларак күрсәтә.

Заманында Әсәл булып уйнаган Татарстанның халык, Россиянең атказанган артисты Наилә Гәрәева коллективның уенын ошатты.

- Без, уйнаганда, Чыңгыз Айтматов әсәренең күтәренке рухта икәнен тойдык. Бездә аны Үзбәкстаннан килгән режиссер куйган иде. Ул чакта киемнәрдә миллилек тә бар иде. Замана да башка иде бит. Шушы спектакльдә уйнап, Тукай премиясе алдык. Әлеге спектакльне караганда да үзебез уйнаган чаклар күз алдына килде. Илдар Хәйруллин әсәрне заманча, гади итеп сәхнәләштергән. Мин, гомумән, Әтнә театры артистларын яратам. Спектакльне Марат Әхмәтшин язган музыка бик күтәрә. Яшьләр дә әйбәт уйнады, - диде ул.