Картаңны туганыңа бирдеңме? Җаваплылыкны да үз өстеңә аласың

Әмма белгечләр кисәтә мондый «ышаныч» кайчак җитди проблемаларга китерергә мөмкин.

Юрист Игорь Запоточный аңлатуынча, закон нигезендә карта белән башкарылган барлык операцияләр аның хуҗасы исәбенә языла. Ягъни картаны кулланган кеше кем булуга карамастан, җаваплылык карта тотучыга төшә.

Шул ук вакытта, картаңны туганыңа яки танышыңа бирү үзе үк җинаять саналмый. Әгәр сез моңа үз теләгегез белән ризалык биргәнсез икән, бу закон бозу түгел. Әмма куркыныч башкада.

Белгечләр ассызыклаганча, банклар операцияләрнең законлы булуын гына күзәтә. Әгәр карта аша шикле операцияләр, мәсәлән, акча «әйләндерү» яки мошенниклык белән бәйле күчерүләр узса, сорау иң элек карта хуҗасына биреләчәк.

— Әгәр дә карта аша законга каршы гамәлләр башкарылса, аның хуҗасын да җаваплылыкка тартырга мөмкиннәр. Хәтта ул үзе турыдан-туры катнашмаса да, ярдәмче буларак каралырга мөмкин, — ди юрист.

Аеруча куркыныч очрак — «дроппер» схемалары. Бу вакытта өченче затлар сезнең карта аша акча «әйләндерә», ә сез, белмичә, закон бозуда катнашучыга әйләнергә мөмкинсез.

Үзеңне ничек сакларга?

• Банк картасын, хәтта иң якын кешеләргә дә, даими куллануга бирмәскә

• Карта реквизитларын (номер, CVV-код) чит кешеләргә хәбәр итмәскә

• Шикле операцияләрне күрүгә үк банкка мөрәҗәгать итәргә

• Мөмкин булса, якыннар өчен аерым карта рәсмиләштерергә

Нәтиҗә гади: карта — ул акча гына түгел, ә җаваплылык та. Аны кемгә бирүегезне яхшылап уйлагыз.

Билгеле булганча, Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.