«Бер-бер артлы китеп бардылар»

“Берничә сәгать элек кенә пост куйган, кабат белеш әле”, – диде. Инде менә бөтен кешене аптырашта калдырып үзе дә мәңгелеккә китеп барды. Язган язмалары, постлары, әти-әнисе, балалары, якыннары, коллектив ятим калды. Безнең күңел бу хәлләргә ышанмый, йөрәк кабул итми. Балтачта яшәүче спорт хәбәрчесе Нурзада абый Сәмигуллин белән дуслар иде алар. Нурзада абый аны шулкадәрле якын итте. “Минем иҗатымны да, үземне дә Радик күтәрде.

Күпме җитәкчеләр белән эшләдем, ничә еллар көрәшчеләр турында яздым, беркем мине белмәде. Бар язганнарымны республика матбугатында бастырып исемемне яңгыратты, алай гына түгел, журналистлар белән рәттән мәртәбәле бүләргә тәкъдим итте. Мең рәхмәтлемен аңа”, – дип телефоннан сөйләшкән саен кабатлый иде. 

Көрәшчеләр турында китапта “Шәһри Казан” газетасы баш мөхәрриренең үзе турында язуын белгәч Нурзада абыйның сөенүләрен күрсәгез. Китапның басылып чыгуын түземсезләнеп көтте. Соңгы айларда шактый авырды шул, озак кына хастаханәләрдә ятты. Тормыш иптәше Рузилә апа саклап ятты.

Хәлләрен белергә, китапны тапшырырга баргач та, икесе бер авыздан безнең редакторга зур рәхмәтләрен җиткерделәр. Бу хакта үзенә дә кайтып әйттем. Радик Рәшит улы коллективны гына түгел, даими авторларны да кайгыртып яшәде, кеше кадерен белүче җитәкче булды. Бер-бер артлы китеп барган әлеге шәхесләрнең урыннары оҗмахта булсын!