– Шотландиядә яшәүчеләрнең татарлар белән нинди охшаш яклары бар?
– Шотландия белән Татарстанның менталитеты һәм мәдәнияте аерыла, ләкин уртак як та бар – үзеңнең мәдәниятеңне һәм телеңне сакларга тырышу. Алар икесе дә – зур дәүләт эчендә яшәүче төбәкләр. Шотландиянең эчке иреге зур, һәм шотландлар моның белән горурлана. Милли бәйрәмнәрдә милли киемнәре саналган килт кияләр, мәктәпләрдә балалар үз халыклары иҗатларын өйрәнә. Бу яктан алар татарларга бик охшаган, чөнки без дә, Россия составында яшәсәк тә, үз телебезне һәм милләтебезне сакларга тырышабыз. Шотландлар да үз традицияләрен һәм милли киемнәрен бик яраталар. Җәен монда хайланд геймс дип аталган бәйрәм үтә. Ул безнең татар сабантуена охшаган. Ир-атлар бүрәнәләр ыргытуда көч сынаша, кызлар милли биюләрне башкаралар, волынкада уйныйлар. Мондый бәйрәмнәрдә һәрвакыт күп кеше җыела. Тантаналы чараларда, бигрәк тә туйларда ир-атлар милли киемнәре саналган килт кияләр. Ул төрле төстә һәм төрле бизәкле була. Монда махсус килт тегә торган кибетләр дә бар. Йон тукымадан тегелгәнгә, килт нык һәм авыр. Аның каравы җылы.
– Шотландиядә татарлар бармы?
– Татарстаннан гына түгел, Себердән, хәтта Кырымнан килгән татарлар да яши анда. Без күп кенә татар гаиләләре белән таныш. YouTube-каналымда «Шотландиядә татарлар» дигән видеолар чыкты. Әти-әнием кунакка килгәч, шул влогларны төшергән идек. Шуннан соң монда яшәүче татарлар минем турында белеп алганнар, алар белән таныштык, хәзер аралашып яшибез.
– Социаль битләрегездә күренгәнчә, сез миллилеккә гашыйк, язылучыларыгызны татар брендлары белән таныштырасыз. Татар милләтен популярлаштыру максатыннанмы бу?
– Мин һәрвакыт милли бизәнгечләргә, этник киемнәргә мөкиббән идем. Чит илгә күченеп, Татарстанны сагына башлагач, аны тормышыма күбрәк кертергә теләдем. Туган ягыма кайткан саен, татар осталарының эшләнмәләрен сатып алырга тырышам. Һәм аларны яратып кулланам. Балаларымда да татар мәдәниятенә кызыксыну тудырасым килә. Шуңа күрә киемдә, көндәлек тормышта, өйдә милли элементлар кулланам, китаплар укыйм, җырлар тыңлатам. Үсә төшкәч, үзләре дә бу мәдәниятне тирәнрәк өйрәнсеннәр иде.
– Чит илдә миллилекне саклау авыр биреләме?
– Читтә үз мәдәниятеңне саклау – җиңел эш түгел, әлбәттә. Алар мәктәптә дә, балалар бакчасында да инглизчә укыйлар. Шуңа да өйдә балалар белән үз телләребездә сөйләшергә тырышабыз. Алар үзләренең дә, шул ук вакытта яшәгән илләренең мәдәниятен дә үз итсеннәр дип телим. Балаларга татар язучыларының әсәрләрен, татар әкиятләрен русчага тәрҗемәдә укыйм. Әлегә татарча иркен сөйләшмиләр, әмма әкренләп ныклап өйрәтергә планлаштырам. Соравыгызга әйләнеп кайтканда, әйе, чит илдә үз мәдәниятеңне саклау җиңел түгел, әмма тырышлык куйсаң – бу мөмкин.
Ләйсән Тимербаева.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар