Казанда беренче тапкыр халыкара хәләл индустриясе форумы узачак

Чарада хәләл продукция җитештерүчеләр, эшмәкәрләр һәм бу өлкә белән кызыксынучылар очрашачак. Оештыручылар белдергәнчә, кунакларны маркет, лекцияләр һәм төрле тематик чаралар көтә.

Форум Казан ЦУМында узачак. Күргәзмә мәйданчыгы интерактив «аэропорт» форматында оештырылачак. Кунаклар өч көн дәвамында, 11:00дән 20:00гә кадәр, хәләл индустриянең төрле юнәлешләре белән таныша алачак.

Хәләл — ризык кына түгел

Чараны оештыручы Әминә Шабанова сүзләренчә, хәләл индустрия азык-төлек белән генә чикләнми. Ул хезмәт күрсәтү, IT, мода, косметика һәм финанс өлкәләрен дә үз эченә ала.

«Кешеләр хәләл индустрияне бары тик азык-төлек белән генә бәйләргә күнеккән, ләкин бу бөтенләй алай түгел. Бу өлкәгә хезмәт күрсәтү, IT-продуктлар, модалы киемнәр һәм башка төрле товарлар да керә. Без бер түбә астында бизнес вәкилләрен дә, яңа дөнья белән танышырга теләгән гади кешеләрне дә берләштерәбез. Бу — эшмәкәрләрнең үсеше өчен бик яхшы мөмкинлек», — дип билгеләп үтте ул.

Форумда беренче көннәреннән үк катнашып килүче Райнур хәзрәт Газизов та чараның әһәмиятен ассызыклады.

«Бу форумны Казанда каршы алу — безнең өчен зур хөрмәт. Без проектның беренче көннәреннән үк катнашып киләбез. Шуны билгеләп үтәргә кирәк: форум турыдан-туры хезмәт күрсәтүгә яки продукциягә генә кагылмый, ул күбрәк идеяләрне һәм кешеләрне берләштерү турында», — диде ул.

80нән артык бренд һәм тематик лекцияләр

Форумда Россиянең 80нән артык хәләл бренды тәкъдим ителәчәк. Кунаклар кием-салым, азык-төлек, косметика, IT һәм финанс продуктлары белән таныша алачак.

Шулай ук танылган спикерлар хәләл бизнес, финанслар һәм гаилә мөнәсәбәтләре турында лекцияләр укыячак. Балалы гаиләләр өчен балалар почмагы да оештырылачак.

Оештыручылар чарага 60 меңнән артык кешенең килүен көтә. Күргәзмәгә керү бушлай, әмма алдан ук «UMMA FORUM»ның рәсми сайтында теркәлергә кирәк.