Россия Мәгариф министрлыгы педагогларның социаль яклавын көчәйтүгә һәм һөнәрнең абруен күтәрүгә юнәлдерелгән закон проектын әзерләгән.
Тәкъдимнәр арасында — хезмәт ветераны статусын алу мөмкинлеге, бушлай юридик ярдәм һәм музейларга ташламалы керү.
Ведомство мәгълүматлары буенча, педагогик стажы 25 елдан ким булмаган укытучыларга «Хезмәт ветераны» статусын алу мөмкинлеген бирү тәкъдим ителә. Моннан тыш, укытучыларга бушлай юридик ярдәм күрсәтү һәм дәүләт һәм муниципаль музейларга айга бер тапкыр түләүсез керү хокукын бирү күздә тотыла.
Яшь укытучыларга остаз ярдәм итәчәк
Закон проектында һөнәргә яңа гына килгән педагогларга да аерым игътибар бирелә. Мәгариф өлкәсендә беренче тапкыр эшли башлаган укытучыларга кимендә бер ел остазлык ярдәме күрсәтү тәкъдим ителә.
Шулай ук педагогларны кимендә өч елга бер тапкыр өстәмә һөнәри белем бирү программалары буенча укыту, методик ярдәм күрсәтү һәм электрон белем бирү ресурсларыннан файдалану мөмкинлекләрен киңәйтү планлаштырыла.
Россия мәгариф министры Сергей Кравцов фикеренчә, укытучы хезмәтенең абруен күтәрү буенча системалы эш илнең барлык төбәкләрендә алып барылырга тиеш.
Укытучыларга ярдәм чаралары киңәйтелә
Моңа кадәр, июль аенда, Россия Президенты Владимир Путин педагогларга ярдәм итүнең өстәмә чаралары турындагы указга кул куйган иде. Анда укытучыларның эш вакытына һәм уку йөкләнешенә кагылышлы таләпләрне камилләштерү, шулай ук педагогларның балаларын балалар бакчаларына беренче чиратта кабул итү мөмкинлеген карау тәкъдим ителде.
Яңа закон проекты укытучыларның социаль гарантияләрен киңәйтүгә һәм алар өчен уңайлырак хезмәт шартлары булдыруга юнәлдерелгән.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар