«Урманны яратканга озак яшәдем»

Миннезәкия апаның гомер юлы сикәлтәсез узмаган. Чордашлары кебек үк, авыр сугыш елларын да, ачлык, ялангачлыкны да кичергән. 18 яшьлек кыз Иске Ибрай егете Минзакирга кияүгә чыккан. Әмма аларны сугыш аерган. Яшь хатын тугыз айлык сабые белән калган. Барлык ир туганнарын, әтисен, ирен фронтка алганнар. Кызганыч, берсе дә әйләнеп кайтмаган.

Миннезәкия апа гомер буе колхозда эшләгән. Чәчкән дә, урган да, ат та җиккән.

- Атлар нык ябык иде. Бер атым үлеп киткәч, хакимияттән: «Синең аркада гына булды бу хәл», - диделәр. Ат урынына сыерымны сорадылар. Ветеринар атны ярып тикшергәннән соң, аның чынлап та ачлыктан, авырудан егылганын ачыклады. Шулай сыер үзебездә калды, ул елларда малың булу зур байлык иде, - ди Миннезәкия апа.

​Аның терәге бердәнбер улы Габдулла абый була. Мәктәптә яхшы билгеләргә укыса да, әнисе хакына, гаиләне туендыру өчен, 13 яшеннән эшкә урнаша ул. Хәзер инде аңа - 76 яшь. Миннезәкия апа Габдулла абый белән оныгы Җәүдәт тәрбиясендә. Ак әбине туган көне белән котларга алты оныгы, 12 оныкчыгы да җыелган.

- Әниебез кинәт кенә яшьли үлеп киткәч, әбиебез безне үз канаты астына алды, әни урынына калган кеше ул. Олы яшендә булса да, үзен үзе йөртә, шөкер, безгә елый‑елый рәхмәт укый, без исә шундый әбиебез белән горурланабыз, - ди оныгы Җәүдәт Шәвәлиев.

Юбилярны туган көне белән тәбрикләргә Аксубай районы башлыгы Камил Гыйльманов та килгән булган. Ул Миннезәкия апага Россия Президенты Владимир Путин белән Татарстан Президенты Рөстәм Миңнехановның котлау хатларын җиткергән, район халкы исеменнән рәхмәт белдергән.

^{Фото: «Авыл таңнары». aksubayevo.ru}