«Хәләл» дигән тамгага ышанырга ярыймы, ризыкның хәләллеген ничек тикшерәләр?

• Элек борынгылар берәр җәнлек аулаганнар да итен алып кайтып ашаганнар. Ә хәзер дөнья үзгәрә, ит әзерләү, җитештерү технологияләре бер урында тормый. Аларга үзгәрешләр кертелеп, яңадан-яңа кушылмалар өстәлеп тора. Һәм болар барысы да ислам күзлегеннән ашарга яраклымы?

Россия территориясендә беренче тапкыр үтә

Казанда узачак Ислам хезмәттәшлеге оешмасының Стандартлаштыру һәм метрология институты Генераль ассамблеясе (SMIIC) утырышында Азия һәм Африка дәүләтләре вәкилләре халыкара стандартлаштыру, метрология, хәләл инфраструктураның туры килүен һәм үсешен бәяләү мәсьәләләре буенча фикер алышачак.

Шунысы игътибарга лаек – әлеге утырыш Россия территориясендә беренче тапкыр үтә. Моннан тыш, ул беренче тапкыр Стандартлаштыру һәм метрология институты әгъзасы булмаган илдә уздырыла. Билгеле булганча, бүген SMIIC-га Азия һәм Африканың 48 дәүләте керә. Россия аның составына күзәтүче ил сыйфатында кергән.

«Бу – зур ышаныч билгесе һәм илебезнең, республика җитәкчесе Рөстәм Миңнехановның ислам дөньясы илләре белән хезмәттәшлекне ныгыту өчен үткәргән системалы эш нәтиҗәсе», – дип билгеләп үтте «Спорт һәм социаль проектлар дирекциясе» коммерцияле булмаган автоном оешмасының генераль директоры Максим Денисов.

Алга таба үсеш юлларын аңларга ярдәм итәчәк

Татарстан мөселманнары Диния нәзарәтенең «Хәләл стандарты» комитеты җитәкчесе Аббас Шляпошников әйтүенчә, ислам илләренең Стандартлаштыру һәм метрология институты ислам дөньясы илләре өчен бердәм сыйфат, метрология һәм аккредитация стандартларын эшләве белән әһәмиятле.