Илгизә Галиуллина
– Ләйсән, сез гел чәчәк кебек балкып торасыз. Бу матурлыкның сере бармы? Косметологка мөрәҗәгать итәсезме?
– Косметологка даими йөрим, ләкин чамасын белеп кенә. Минем үзем булып каласым килә, шуңа булган матурлыкны саклау өчен чаралар күрәм. Хәзер хатын-кызлар үз-үзен ярата, карый. Аның өчен мөмкинлекләр дә күп. Әле дә хәтерлим, әнинең шул бер иннеге бар иде. Анысын да сирәк кенә сөртте. Ә хәзер авыр, кыйммәтле процедуралар ясамыйча да, үз-үзеңне карарга була. Кайберәүләр чаманы да югалтадыр инде...
– Хәзер мәктәп балалары да оста бизәнә. Сез кызларны бу яктан чикләмисезме?
– Яшүсмер вакытында Таңсылу да өйдән керфек буямыйча чыкмады. Тырнак ясатты, катлы-катлы макияж... Мин, әлбәттә, әйтеп карадым. “Син бит әле бала, кая барасың алай?” – дидем. Аллаһка шөкер, ул вакытлар үтте. Әгәр мин “ярамый” дип сүземдә каты торсам, бәлки, миңа уч итеп тагын да ныграк бизәнер иде. Без бит җәмгыятьтә яшибез. Ни дисәк тә мохитнең дә безгә йогынтысы зур. Кешенең үз фикерен, үз йөзен әле булмаган вакытта, әлбәттә, җәмгыять агымына кереп тә китәсеңдер. Әмма барысы да вакытлыча. Минем дә бунтарь чорым булды. 16 яшемдә көллияткә укырга килгәч, бер ел туганнарда яшәдем. Ул вакытта шәһәр кызларының ничек киенгәнен читтән генә күзәттем. Икенче елны тулай торакка күчендем. Менә шул вакытта кышын кыска итәк киеп, аякларны өшетеп йөрдем инде. Нечкә кашлар, кызыл иреннәр... Хәзер шул фотоларны карагач, үземне танымыйм. Ярый әле ялгыш юлдан Аллаһ саклаган. Балага тәрбия бирү зур эш ул. Ничек кенә ачулансаң да, акыл өйрәтсәң дә, барыбер, бала әти-әнисен кабатлый. Бу егетләргә дә, кызларга да кагыла.
– Ләйсән, хәзер сезнең җырларны да яңартып башкаралар. Бу күренешкә ничек карыйсыз?
– Хәзер, гомумән, эстрадада гына түгел, башка өлкәләрдә дә үткәннәрне сагыну, ностальгия хисләренә бирелү ешайды. Бу дөньякүләм тренд һәм мин аны бик теләп кабул итәм. Минем балачак җырларын да яңарта башладылар, аларны тыңлагач, шул чорга, шул истәлекләргә кайткан кебек булам. Икенче яктан, авторлык хокуклары, канун турында да онытырга ярамый. Мәсәлән, Искан “Яшьлегем чишмәләре”н яңартты. Алдан шалтыратып рөхсәт сорадылар, хәтта социаль челтәрләр өчен бергә видео да яздырдык. Рөхсәт сорамыйча гына эшләү, башка мәсьәлә. Анысы бик үк матур күренеш түгел инде.
– Сезнең белән бәйле бер пиар-адым да хәтерләмим. Андый әйбер эшләгәнегез булдымы?
– Минем өчен пиар-адым – ул нәрсәдер уйлап чыгару, уйдырма. Андый әйбер эшләгәнем булмады. Без җырлый башлаган вакытта махсус пиар-адым уйлап утыручы да булмады. Кайбер газеталар уйдырма бастыра иде, әмма шәхсән мин продюсер белән: “Әйдә шулай эшлик әле”, – дип пиар уйламадым. Башкаларга пиар тәкъдим иткәннәре булды, әмма бу миңа кагылмады. Бәлки, мин үземне шулай куйганмындыр да.
– Социаль челтәрләрне бик актив алып бара идегез. Бераз сүрелдегез кебек. Хакмы?
– Без видеоларны азрак төшерә башлаганга, бәлки, шулай тоеладыр. Тулаем, без туктап тормыйбыз. Хәзер интернетта да кешеләр бер-берсен кабатлый. Минем алай эшлисе килми. Ә үзеңә ниндидер яңалык уйлап табу өчен вакыт кирәк. Болай көн саен диярлек хәбәргә чыгам. Бу – заман таләбе. Социаль челтәрләрең булмаса, заманнан төшеп каласың төсле.
– Кызларыгыз блогер булып китсә, каршы килмисезме?
– Без бер ара шундый күп видео төшердек. Көн саен диярлек эшләдек. Билгеле, видеоларда кызларыбыз да катнашты. Алар шулкадәр арды, туйды. “Актер буларак гонарар түлим”, – дип тә кызыктырып караган чаклар булды. Хәзер дә кайвакыт кызларны төшерәсе килә, ләкин алар каршы. Шуңа кызлар блогерлар булыр дип уйламыйм.
– Хәзер сез күбрәк гаилә дуэты буларак чыгыш ясыйсыз. Аерым проект, Ләйсән Гыймаева брендын торгызасы килмиме?
– Мин хәзер дә җырлар яздырып торам. Мәгънәле, матур җырлар күп. Ләкин соңгы арада миңа Булат белән бергә җырлау күбрәк ошый дигән нәтиҗәгә килдем. Янымда Булат булганда үземне иркенрәк тоям, миңа рәхәт.
– Булат белән бергә гомер итүегезгә 23 ел икән. Бу елларны исәпкә алсак, кайсы чор иң матуры, рәхәте?
– Хәзерге тормышыбыздыр. Элегрәк бер-беребезне аңламаган вакытлар да булды. Булатның ныгытып ишек ябып чыгып китүе, миңа үткәннәрне искә төшерә. Беренче тапкыр бала тапканнан соң, төшенкелеккә бирелдем. Әти-әни еракта, ир – эштә. Без арендага алган фатирда яшибез. Ул шундый шыксыз, салкын иде. Баланың елау тавышлары... Шуларны күз алдына китерәм дә, хәзер бик рәхәт. Без бер-беребезне күз карашыннан аңлый башладык. Гаиләдәге урыным, гомумән, хәзерге тормышыбыз күбрәк ошый.
Билгеле булганча, Татарстанда «Гаилә» илкүләм проекты гамәлгә ашырыла.
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар
8
0
Бик матур парлар,ижатлары да кешелэрне сокландыра,уйлата торган.Унышлар гыналдаш булсын узлэренэ!
0
0