Җылы сөяк сындырмый: көзен ничек матур киенергә?

Ничек матур күренергә?

Көз - салкын тидереп авыручылар чоры. Моңа еш кына хатын-кызның һава торышына туры китереп киенмәве дә сәбәпче булырга мөмкин. Чибәр күреним дип җиңелчә генә киенгән хатын-кызның урамга чыккач нинди матурлыгы калсын ди?! Күшеккән кул, кызарган борын, калтырап торган гәүдә, әлбәттә, безне бизәми, ә күп кенә кирәкмәгән чыгымнар һәм мәшәкатьләргә сәбәпче булырга мөмкин. Кыска куртка, җиңелчә плащларны онытып, юка колготки һәм җиңелчә туфлиларны шкафка җыеп куеп, җылы итеп кие­нер вакыт бит ул көз уртасы.

Җылы пальтоларга күчәр чак җитте. Аларны һәр кеше үз кесәсенә һәм фигурасына туры килерлекне сайлый ала. Пальтога килешле җылы сапоги яки ботильон белән дә матур итеп киенеп йөрер­гә була. Хатын-кызның көзге киеме күп катлы булырга тиеш. Урамда һава температурасы +10 яки аннан да түбән икән, башка эшләпә яки башлык кияргә, муенга шарф урарга һәм әлбәттә, перчатка турында да онытмаска кирәк. Мондый аксессуарлар җылы булудан тыш, образыгызны тулыландырып, үзенә күрә бер матурлык өстәячәк.

Көзге киемнәр бер тонда булырга тиеш дигән сүз дөрес түгел. Затлы күренү өчен, киемнәрегезне ачык төстәге сумка, шарф яки зонтик белән тулыландырып җибәрергә мөмкин.
Озын сапогилар һәм ботильоннар, биек үкчәле булмаса да, итәк яки күлмәк белән матур күренә. Икеләнсәгез яисә алай киенү ошамаса, күңелегезгә хуш килгән классиканы сайлагыз.

Төсләр түгел, җылылык мөһим

Көзен, гадәттә, күп кенә хатын-кызлар кара төскә өстенлек бирергә ярата. Соры төстәге пальто яки жакет кара төстәгегә караганда күпкә матуррак һәм отышлырак. Әгәр шәраб төсендәге кием­нәр сайласагыз, аларга алтын төсендәге аксессуарлар килешәчәк һәм бик затлы күренәчәк. Кара һәм соры төсләргә өстенлек бирсәгез, көмеш төсендәге аксессуарлар, бизәнү әйберләре сайлагыз.
Аяк киеме белән сумка, плащ яки пальто төс буенча туры килмәсә, бер дә борчылмагыз, хәзерге мода кануннары моңа хәтта өстенлек бирә.
Көзге салкын көннәрдә үзегезне яхшы хис итим дисәгез, җылы киенеп йөрегез. Көн саен кию өчен төрле төстәге, ләкин чуар булмаган берничә водолазкагыз булса яхшы. Җылы чалбар һәм итәкне әлеге водолазкалар белән төрләндереп, матур итеп киеп йөрергә мөмкин. Исегездән чыгармагыз: җылы сөяк сындырмый.