#Кыскача яңалыклар 26 июль 2016, 10:52

Августта Эрдоган Россиягә килә

26 июль 2016, 10:52

Төркия вице-премьеры Мехмет Шимшек Президент Реджеп Тайип Эрдоганның 9 август көнне Санкт-Петербургка килергә җыенганын әйткән. Бу белдерүне ул Рссия вице-премьеры Аркадий Дворкович белән очрашу вакытында ясаган, дип яза "Интерфакс".

Скопировать ссылку

Мехмет Шимшек сүзләренчә, Төркия Россия белән мөнәсәбәтләрне узган елның ноябренә кадәр булганнан яхшырак итәргә тели.

"Без вәзгыятьне һәм 24 ноябрь көнне өзелгән мөнәсәбәтләрне мөмкин кадәр тизрәк җайлау өчен бирегә килдек. Россия безнең якын күрше генә түгел, стратегик партнер да. Безнең мөнәсәбәтләр билгесез вакытка өзелде. Әмма без аларны 24 ноябрьгә кадәр булганнан яхшыртырга телибез", - дип билгеләп үткән Төркия вице-премьеры.

Ул хәбәр иткәнчә, Төркия Россиягә чартер рейсларны яңарту өчен куркынычсызлык тәэмин итү турында доклад тәкъдим иткән.

Мехмет Шимшек шулай ук Россия җитәкчеләренә хәрби түнтәрелешкә омтылыш вакытында ярдәм иткән өчен рәхмәт белдергән.

Үз чиратында Дворкович, Россия һәм Төркия башлыклары очрашуы августның беренче яртысында булырга мөмкин дип билгеләп үткән. Аның сүзләренчә, Россия Төркия белән элемтәләрне яңарту өчен мөмкинлекләрнең яхшы булуын күрә.

"Сәүдәне, инвестицион хезмәттәшлекне яхшырту, зур проектларны тормышка ашыру, шул исәптән туристлар агымын торгызу өчен дә мөмкинлекләребез яхшы. Моның өчен тиешле шартлар һәм куркынычсызлык гарантиясен булдырырга кирәк", - дип өстәгән Дворкович.