#Язмалар 26 октябрь 2026, 16:34

Төнге икедә юлга кузгалалар, иртәнге алтыда елмаеп сәхнәгә чыгалар

26 октябрь 2026, 16:34

Әлки районының мәдәният бүлегендә эшләүче Гөлфирә Нургалиеваның җырлавын ишеткән һәркем аны зур сәхнәләрдә чыгыш ясарлык җырчы дип уйлый торгандыр.

Скопировать ссылку

Төнге икедә юлга кузгалалар, иртәнге алтыда елмаеп сәхнәгә чыгалар

45 яшен билгеләп үткән көннәрдә ул үзенең беренче сольный концертын оештыра һәм 350 кешелек тамаша залын шыгрым тутыра.

Төн уртасында юлга чыккан артистлар

Көз җитү белән республика шәһәрләрендә авыл хуҗалыгы ярминкәләре башлана. Шәһәр халкын авылдан килгән сый-нигъмәтләр генә түгел, районнардан килгән талантлар да каршы ала. Ярминкә көннәрендә мәйданнар җыр-моңга күмелә. Кар-буранга, яңгырга карамыйлар, үзәккә үтәрлек салкын җилләр иссә дә, артистлар елмаеп халык алдына чыга. Иртән таң атканчы юлга чыккан бу талантлар көн дәвамында халыкның күңелен күрергә тырыша. Ә шәһәр халкы аларның чыгышларын карап, рухи ял ала.

Гадәттә, ярминкәгә килгән сатучылар, җитештерүчеләр турында сөйлибез. Ә халык күңелен күреп, җыр-моң таратучылар күләгәдә кала. «Шәһри Казан» авылларда яшәүче әнә шундый талантларны барларга булды.

— Шәһәр халкына концерт кую өчен кайвакыт төнге икедә юлга кузгалабыз, иң соң кузгалган вакытыбыз — дүрттә. Иртәнге алтыда ярминкә бәйрәмен башлап җибәрү өчен әзер булырга тиешбез, — ди мәдәният өлкәсендә 25 ел эшләүче Гөлфирә Нургалиева. — Көндезге уникегә кадәр концерт куябыз. Нинди генә хәлдә булсак та, арыганлыгыбызны сиздермибез. Дөрес, юл бик ардыра. Шулай да сәхнәдә елмаеп торырга тырышабыз.

Гөлфирә. фото с личного архива

Гөлфирә мәдәният институтының хор бүлеген тәмамлагач, 2001 елда туган районындагы мәдәният бүлегенә эшкә чакырыла. Шуннан бирле мәдәнияткә һәм халыкка хезмәт итә. Бүгенге көндә ул өч ансамбльне җитәкли. Болар — өлкәннәрдән торган «Сударушки», авылларда эшләүче мәдәният хезмәткәрләреннән тупланган «Зиләйлүк» һәм өч кешедән торган «Сөмбелә» триосы.

— Триода җырлаучы өчебез дә мәдәният өлкәсендә эшлибез. Без барлык чараларда да чыгыш ясыйбыз. Ә ансамбльләр белән төрле конкурсларда, фестивальләрдә катнашабыз. Районда узган ярминкәләрдә дә, башка бәйрәмнәрдә дә чыгыш ясыйбыз. «Сударушки» ансамблендә 80 яшьтән узганнар да бар. Шуңа күрә аларның мөмкинлекләрен исәпкә алып, төрле чараларда катнаштырабыз, — ди Гөлфирә.

гөлфирә. фото с личного архива — «Сөмбелә» триосы мәдәният өлкәсендә эшләүчеләрдән тупланган

Гаиләләре белән талантлар

Гөлфирә тумышы белән Әлки районының Түбән Әлки авылыннан. Кечкенәдән җырга-моңга сәләтле кыз дүртенче сыйныфта укыганда кулына баян ала һәм үзлегеннән уйнарга өйрәнә. Югары уку йортына да баянчы буларак осталыгын үстерү теләге белән бара. Әмма нота белмәве сәбәпле, аны баян бүлегенә алмыйлар, хор бүлегендә укырга тәкъдим итәләр. Гөлфирә танылган җырчы Лилия Муллагалиева белән бергә белем ала. Сабакташлары белән бүген дә аралашып тора.

— Лилия концертыма да кайтып, чыгыш ясады, — ди Гөлфирә.

Аның хыялын ике улы тормышка ашырырга ярдәм иткән. Ул икесен дә музыка мәктәбенең баян классына укырга биргән. Олы улы Булат баян классын бишле билгеләренә тәмамлап, укуын башка юнәлештә дәвам иткән.

— Баянчы булмаса да, тиешле дәрәҗәдә уйнарга өйрәнде. Икенче улым Салават та баян дәресләренә бик теләп йөри. Бәлки, ул минем хыялымны дәвам итеп, шушы юнәлешне сайлар, — ди ана.

Гөлфирә — янып яшәүче ханым. Гаиләсе дә үзе кебек үк сәләтле. Нургалиевлар бергәләп туйлар, юбилейлар һәм төрле чаралар уздыралар.

— 2001 елдан бирле бәйрәмнәр оештырабыз. Районга да, Казанга да, Чаллыга да, Мәскәүгә дә чакыралар. Мөмкинлегебез булса, барысына да барабыз. Ирем башка өлкәдә эшләсә дә, бәйрәмнәр уздыруда Равилем — уң кулым. Ул мине аңлый, үзе дә бик матур җырлый, бергәләп тә җырлыйбыз. Парлап чыгып китәбез, бергә кайтып керәбез.
Эшем бик ошый. Өйдә урыннан тора алмаслык булып авырып яткан вакытларым да була. Ә халык алдына чыгып баскач, бөтенесе онытыла, бәйрәмне алып барам. Тамашачы алдына чыгып басуның әйтеп, аңлатып бетерә алмаслык үз рәхәте бар. Моны бары тик шушы өлкәдә эшләүчеләр генә белә, — ди Гөлфирә.