Россиядә 3 ноябрьдән банкротлык турындагы канунга үзгәрешләр кертелә, алар гражданнарның берничә категориясенә судтан тыш банкротлык процедурасына мөрәҗәгать итәргә мөмкинлек бирә.
Бу хакта журналистларга Татарстанда “Күп функцияле үзәк” дәүләт бюджет учреждениесе директоры урынбасары Руслан Нигъмәтуллин аңлатты.
Судтан тыш банкротлыкка чыккан яңа категорияләр арасында бары пенсия акчасына көн күрүче һәм башка мөлкәте булмаган пенсионерлар, бердәнбер керем чыганагы буларак балага пособие алучы гражданнар, шулай ук башкарма производство 7 елдан артык дәвам иткән һәм үтәлмәгән яки өлешчә үтәлмәгән гражданнар бар.
2023 елның ноябренә кадәр судтан тыш банкротлык процедурасы керемсез һәм мөлкәте булмаган кешеләр өчен генә булган. Шулай ук судтан тыш банкротлыкка мөрәҗәгать итү өчен суммалар үзгәрде.
Әгәр аның гомуми бурычы 25 меңнән 1 млн сумга кадәр булса, граждан процедурага мөрәҗәгать итә ала. Судтан тыш банкротлык турында гаризаны күп функцияле үзәк аша гына бирергә мөмкин. Әмма алимент, хезмәт хакы һәм сәламәтлеккә зыянны яки мораль зыянны каплау кебек бурычларның кайбер төрләре исәптән алынмаячак.
Шулай ук гариза бирүче гаризадагы барлык бурычларын күрсәтергә тиеш.
Кызыклы яңалыкларны күзәтеп бару өчен Телеграм-каналга кушылыгыз.
Комментарийлар