Башта укы, аннан соң акчаңны сана

Татарстан Республикасында кеше хокуклары буенча вәкаләтле вәкил Сәрия Сабурская сөйләгәнчә, Казан район­нарында «Хокук белеме» көннәре үткәрелгән.

- Алабуга белән Лениногорск район­нарында - ноябрьдә, ә Питрәч белән Лаеш районнарында декабрьдә «Хокук белеме» көннәре оештыру планда бар. Очрашуларда юристлар, белгечләр, район башлыклары катнаша. Коммуналь тармакка кагылышлы сорауларга шунда ук җавап бирелә. Мондый чараларның тәэсире көчле, - диде Сәрия Сабурская.

Дәүләт торак инспекциясе җитәкчесе Сергей Крайнов 2008 елдан башлап рес­публикада күп фатирлы йортларны капиталь төзекләндерүгә 53 миллиард сум акча тотылганлыгын искә төшерде. Казанда ишегалларын төзекләндерүгә генә дә 1 миллиард сум юнәлтелгән.

- Элек кешеләр йорт подвалларын су басуга, түбәдән су үтүгә зарланалар иде. Хәзер инде ишегалларын төзекләндерүне, балалар уен мәйданчыклары ясауны сорыйлар, - диде Сергей Крайнов. - 6 миллион сум штраф салынды. Штрафны идарәче компанияләргә түгел, ә идарәче компанияләр җитәкчеләренә салырга тырышабыз. Штрафны юридик затка язсаң, алар аны халыктан коммуналь хезмәтләр өчен җыелган акчадан түлиләр.

Моннан ары, тәгаен адресаты билгеле булмаган, электрон рәвештә җибәрелгән шикаятьләр тикшерелмәячәк. Шикая­тегез тикшерелсен өчен, башта Россия Торак-коммуналь хуҗалык министрлыгы сайтында теркәлү (идентификация) үтәргә кирәк. Сергей Крайнов бу таләпне хупламавын әйтте.
«Торак-коммуналь хуҗалык өлкәсенә җәмәгатьчелек контроле төбәк үзәге» башкарма директоры Дмитрий Романов сөйләгәнчә, үзәктә быел 1,5 мең кеше торак-коммуналь темасына курслар узган. Курсларны интернет аша да узып була. Казанда Лобачевский урамындагы 10 в йортында урнашкан үзәкнең «кайнар элемтә» телефоны: 8 (843) 236-29-97. Атнаның эш көннәрендә 9.00-18.00 сәгатьләр аралыгында шалтыратырга мөмкин.