Басу-кырларны сугару өчен 500 миллион сум

Быел Татарстан районнарына басу-кырларны сугару эшенә 500 миллион сум акча бүлеп биреләчәк. Россия Авыл хуҗалыгы министрлыгы карамагындагы "Татмеливодхоз" идарәсе директоры Марс Хисмәтуллин "БИЗНЕС Online" газетасына әнә шулай дип белдергән. Аның сүзләренә караганда, 2015 нче елга бу максатларга федераль бюджеттан 200 миллион, республиканыкыннан - 170 миллион, бюджеттан тыш чыганаклардан 170 миллион сумлык ярдәм бирү көтелә. Моннан тыш, федераль программалар ярдәме белән сугару системалары төзү, төзекләндерү өчен тотылган чыгымнарның 50 %ын кайтару да каралган. 2015 елда Татарстанда 59 буа һәм гидротехник корылмаларны яңарту, 3 мең гектар мәйданда сугару җирләрендә төзекләндерү һәм төзелеш алып эше бару планлаштырыла.