Дәүләт Советының элеккеге депутаты янә суд каршына басты

12 декабрь көнне Татарстанда республика Дәүләт советының элеккеге депутаты Рөстәм Хәсәновка карата хөкем карары үз көченә керде. Республика Югары судында аны прокуратура да, наркотиклар сатып алу һәм саклау өчен хөкем ителгән зат та бәхәсләшергә тырышты.

Исегезгә төшерәбез, 3 ноябрьдә Казанның Мәскәү район суды экс-депутат һәм бизнесмен Хәсәновны 1,88 г мефедрон сатып алуда һәм саклауда гаепле дип тапты һәм аны шартлы рәвештә 1 елга ирегеннән мәхрүм итүгә хөкем итте. Хөкем карарына ярашлы, нәкъ менә Хәсәнов кулланган гаджет аша 2023 елның 17 сентябрендә интернет аша 4 мең сумга синтетик наркотик сатып алынган. Ә аннары элекке депутат виртуаль сатучы күрсәткән наркотик яшерелгән урынга — Беломорская урамындагы урман массивына бара. Урманнан чыкканда полиция хезмәткәрләре аны күреп алына, Хәсәнов кесәсеннән пакетны ташлый. Соңрак медицина оешмасында анализ бирүдән баш тарткан өчен 4 мең сумлык административ штраф салына.

Бу вакыйгадан соң Хәсәнов үз теләге белән депутат вәкаләтләрен тапшыра. Ул үз гаебен тулысынча таныган, судта соңгы сүзендә үз гамәлен «көтелмәгән хәл» дип атаган.

Эшне махсус тәртиптә караганда гаепләнүченең адвокаты Руслан Игнатьев эзәрлекләүне туктатуны һәм судтан бары штраф билгеләүне сораган. Ул билгеләп үткәнчә, Хәсәнов тикшерүгә ярдәм күрсәткән һәм җәмгыятькә һәм дәүләткә килгән зыянны каплаган, «Татарстанның күп балалы гаиләләре»төбәкара оешмасы адресына хәйрия взносы ясаган.

Хөкем карарыннан соң Хәсәнов апелляция шикаятен биргән. Дәүләт гаепләүчесе Виктория Аюпова, үз чиратында, экс-депутатка билгеләнгән җәза артык йомшак дигән фикер җиткергән. Бәхәсләрдә ул шартлы рәвештә 1 ел 3 ай вакыт сорады.