Габдулла Тукай исемендәге V Бөтенроссия бәйгесенең финал турлары уза

20 нче апрельдә Казанда Марсель Сәлимҗанов исемендәге Актерлар йортында шигырь укучылар арасында Габдулла Тукай исемендәге V Бөтенроссия бәйгесенең финал турлары башлана. Бәйге Бөек Ватан сугышында Җиңүнең 70 еллыгына багышлана. Шигырь укучылар жюри әгъзаларына татар яки рус телләрендә татар әдипләренең Бөек Ватан сугышы турындагы шигырь яки проза әсәрләрен укыячаклар. Конкурска катнашу өчен Татарстан Республикасы, Мәскәү, Красноярск, Омск, Саратов, Пенза, Свердловск өлкәсе, Удмуртия, Мари Эл, Башкортстан республикаларында яшәүчеләрдән 250 артык гариза кабул ителде. Шигырь укучылар арасында 7 яшьлек балалар, театр һәм музыка училищесы, югары уку йортлары студентлары да бар. Бәйге 24-нче апрельдә Марсель Сәлимҗанов исемендәге Актерлар йортында гала-концерт белән тәмамланачак.