Иң яхшы мәктәп театрын ачыклыйлар

Бүген Халыклар дуслыгы йортында Казанда татар телендә чыгыш ясаучы иң яхшы мәктәп театры төркемнәре катнашында "Сәяр" фестиваленең финал туры үтә. Сайлап алу турлары 10-13 март көннәрендә үтте. Финалга башкаланың һәр районыннан 2 театр төркеме чыкты. Жюри составында Театр дөньясын яктыртып баручы "Сәхнә" журналының баш мөхәррире, язучы Зиннур Хөснияр, Камал театрының баш режиссеры Фәрит Бикчәнтәев, Татарстанның халык артисты Зөфәр Харисов, Камал театры режиссеры Илгиз Зәйниев, язучы, шагыйрь Разил Вәлиев, язучы, Габдулла Тукай исемендәге премия лауреаты Нәбирә Гыйматдинова кебек күренекле сәнгать әһелләре дә бар.