Кабан күле ярында Илһам Шакировка трибьют концерты узачак

Иҗат кичәсенең оештыручылары – Казанның Парклар һәм скверлар дирекциясе һәм Yummy Music музыкаль лейблы.

Трибьют — артистка һәм аның иҗатына хөрмәт белдерү кичәсе. Yummy Music Band супертөркеме Шакировның төрле елларда башкарылган җырларын яңа, әмма бик сакчыл интерпретациядә уйнаячак. Төркем белән бергә Алинә Шәрипҗанова, Артур Исламов, Эльза Зәяри, Илгиз Шайхразиев һәм Эльвира Мифтахова чыгыш ясачак.

Илгиз Шайхразиев һәм бэнд башкаруындагы тәүге синглны инде барлык музыкаль мәйданнарда тыңлап була. Бу — тере музыкаль составта һәм беренче дубльдән яздырылган «Керфекләрең синең нигә кара» халык җыры.

Чара 19:00 сәгатьтә Malsi Music диджей-сетыннан башланып китәчәк. Ә бэнд сәхнәгә 20:00дә чыгачак. Үткәрелү урыны: Камал театры яклап күл буена төшү юлы. Керү бушлай.

Аннан тыш, трибьют алдыннан Кабан буенда Илһам Шакировның тормышы һәм иҗат юлына багышланган күргәзмә ачылачак. Күргәзмә белән август уртасына кадәр концерт уза торган урында танышып булачак. 

Кабан яр буе трибьютны уздыру урыны буларак юкка гына сайланмады. Бүгенге көндә заманча җәмәгать урынының киңлеге шәһәрнең актив берләшмәләре белән ачык әңгәмә төзүгә, урынның мәдәни үзенчәлеге белән эшләүгә һәм татар мәдәниятен заманча шартларда үстерүгә юнәлтелгән.

Yummy Music — заманча татар музыкасын үстерү белән шөгыльләнүче беренче татар инди-лейблы. Yummy Music Band — төрле юнәлешләрдә иҗат итүче, ләкин Юрий Федоров һәм Илнар Фатыйхов җитәкчелегендә берләшкән Казанның профессиональ музыкантлары төркеме.