Магаданда бензинга талон кертелгән

Төбәк хакимияте сайтына куелган аңлатмага караганда шөбһәләнерлек җирлек юк. Магадан өлкәсенә нефть продуктлары ташый торган танкер ватылган. Шул сәбәпле, АИ-95 бензинын сату күләменә вакытлыча чикләү кертелгән. Башка нефть продуктларына кытлык күзәтелми. Колымада АИ-92 бензины 45,03 сумга, АИ-95 бензины 47,27 сумга, ә дизель ягулыгы 45 сум 80 тиенгә сатыла. Җирле хакимият, АИ-95 маркалы бензинга кытлык килеп туудан, ягулыкка бәяләрнең артуына ирек бирмәгән.

Россиядә АИ-95 бензинына иң арзан бәя Иваново белән Курган өлкәләрендә -35,87 сум. Ярославль өлкәсендә-36,09 сум, Чечня Республикасында 36 сум 12 тиен. Иң кыйммәт бәя Чукотка автономияле округында-анда АИ-95 бензинының бер литры 56 сум. Камчатка краенда - 45,68 сум, Сахалин өлкәсендә - 45,47 сум, Кырымда 41 сум 82 тиен.
Казанда 23 гыйнварда автомобильләргә ягулык салу станцияләрендә АИ-92 бензины бәяләре: "Татнефть" белән "Татнефтепродукт" та-34,8 сум, "Лукойл"да-35,2 сум, "Башнефть" тә-34 сум 9 тиен. "Татнефть" , "Башнефть" һәм "Лукойл" станцияләрендә АИ-95 бензины 37,9 сум, "Татнефтепродукт" та 37 сум 78 тиен иде.

- Ерак Көнчыгышта берничә ел яшәдем. Анда транспорт элемтәсе кыенлыгы булгалый. Магаданда АИ-95 бензины кытлыгыннан шулай бөтен ил күләмендәге "фаҗига" ясау һич кирәкми иде, минемчә. Автомобилемә АИ-95 бензинын, гомумән дә, салганым юк, гел АИ-92не кулланам. Татарстанда бензинга кытлык туар дип уйламыйм. Өзеклек булса да, әнә метрода яки троллейбуста йөреп торырмын. Электр уты бетмәс әле, - дип кул гына селтәде автоһәвәскәр Фәрит Хәмидуллин бу уңайдан.