Милли музей хатирәләр яңартырга чакыра

«Көнчыгыш - Көнбатыш» турниры Милли музейда элек тә уздырыла иде. Быел реконструкторлар беренче тапкыр тамаша өчен Урта гасыр дәверен түгел, ә нәкъ менә героик 1812, 1941-1945 елларны сайлаган.

11 июнь көнне 1812 елгы Ватан сугышына багыш­ланган программа күрсәтелә. Музейга килүчеләр XIX гасырдагы поход тормышы эпизодлары, дуэль традицияләре белән таныша алачак. Шулай ук бал биюләре буенча мастер-класс, җырлар һәм романслар концерты, цирк тамашасы булачак, костюмнарны реконструкцияләү барышы күрсәтеләчәк. Наполеон сугышы күренешләренең эпизодлары белән танышырга мөмкин.

12 июнь программасы тулысынча 1941-1945 еллардагы Бөек Ватан сугышына багышлана. Сугыштан соңгы 40нчы еллар... Тынлы оркестр... Ә бию коллективы үзенең «Бүген кич белән биюләр була» исемле программасы белән музейга килүчеләрне әби-бабайларыбызның яшьлегенә алып кайтачак.

Музей залларында Россиянең Ватан сугышына багышланган «12нче ел гарасаты», «Бөек билгесез сугыш», «Бөек Ватан сугышы елларында Татарстан» исемле күргәзмәләр эшләячәк.