Сезнең хакта күп язалармы?

Иҗтимагый палатада матбугат һәм массакүләм мәгълумат чаралары белән багланышлар комиссиясенең киңәйтелгән утырышы кысаларында узган очрашуны комиссия рәисе, Казанның «Достижения молодых» үзәге башкарма директоры Ләлә Бикчентаева әнә шулай башлап җибәрде.

«Татмедиа» һәм Татарстан журналистлар берлеге оештырган әлеге чарада сүз, нигездә, коммерциячел булмаган оешмаларның республика басмалары белән үзара хезмәттәшлеге хакында барды да.

Журналистлар кызыксынырлык итеп ничек үзеңне тәкъдим итәргә? Пресс-релизны ничек дөрес итеп язарга һәм журналистларга җибәрелгән чакыруны аларның игътибарыннан читтә калмаслык, кызык булырлык итеп ни рәвешле эшләргә? «Уникаль материал» - нәрсә ул? Очрашуда катнашкан ГТРК «Татарстан» директоры Фирдүс Гыймалтдинов, Татарстан Журналистлар берлеге рәисе урынбасары, «Казанские ведомости» газетасының баш мөхәррире Венера Якупова һәм «РБК-Татарстан»ның һәм «События» интернет басмасының баш баш мөхәррире Кирилл Шлыков әлеге һәм башка күп кенә сорауларга җавап бирделәр.

- Еш кына иҗтимагый палатадагы коллегалардан, коммерциячел булмаган оешма җитәкчеләреннән журналистлар уздырылган чаралар турында дөрес язмый яки бөтенләй килмиләр дигән сүзләрне ишетергә туры килә. Массакүләм мәгълумат чараларына үпкәләргә ярамый. Көн дәвамында редакция координаторына шуның кадәр күп мәгълумат керә, журналистлар нибары ике-өч чарада катнашырга гына өлгерә. Пресс-релиз җәлеп итәрлек итеп язылмаганда, сез уздырган чара вакыйга буларак бик үк мөһим, масштаблы булып күренмәскә дә мөмкин. Оештыручыга кызык тоелган әйбер, һәрвакытта да киң аудитория өчен мөһим булмаска да мөмкин - аның ул ягы да бар. Әлеге семинар коммерциячел булмаган оешма вәкилләренә массакүләм мәгълүмат чаралары белән эшләүдә, мөнәсәбәтләрне җайга салуда гап-гади кагыйдәләрне төшендерү максатыннан оештырылды, - дип ассызыклап узды Татарстан Республикасы Иҗтимагый палата әгъзасы, «Шәһри Казан» газетасының баш мөхәррире Гөлнара Сабирова.

Нигездә семинар зур кызыксыну тудырды һәм анда катнашучылар әлеге чарада күтәрелгән мәсьәләләрнең актуальлегенә басым ясадылар.