Төркия Россиягә каршы уздырылучы Көнбатыш санкцияләрен хупламый

Татарстан Президенты вазифаларын вакытлыча башкаручы Рөстәм Миңнеханов Төркия Республикасы Бөек Милли Мәҗлесе рәисе Җәмил Чичәк белән очрашты. Әлеге очрашуда Татарстан Дәүләт Советы рәисе Фәрит Мөхәммәтшин, республика Президенты ярдәмчесе Радик Гыйматдинов, Татарстан Инвестицион үсеш агентлыгы җитәкчесе Талия Миңнуллина, Россия Дәүләт Думасы депутаты Илдар Гыйльметдинов, Төркия делегациясе вәкилләре катнашты.

- Татарстан Төркия Республикасы дәүләт хакимияте органнары һәм бизнес-бергәлекләре белән тыгыз хезмәттәшлектә, - дип белдерде Татарстан Республикасы Президенты вазыйфаларын вакытлыча башкаручы Рөстәм Миңнеханов. Аның фикеренчә, Анкарадан «Бигеш» аэропортына туры авиарейс булу багланышларны тагын да ныгытачак.

- Төркия Россиягә каршы уздырылучы Көнбатыш санкцияләрен хупламый. Без Россия белән хезмәттәшлекне киңәйтергә телибез. Ә Татарстан безнең өчен - Россия белән Төркияне тоташтыручы күпер. Безнең тарихыбыз уртак, - диде Җәмил Чичәк.

^{Фото: intertat.ru}