Укучылар өчен махсус банк картасы

Бүген Чаллы һәм Түбән Кама шәһәрләрендә "Укучы картасы" дигән проект старт ала. Ачылу тантансында Татарстанның мәгариф һәм фән министры Энгель Фаттахов, Республиканың информацион технологияләр үзәге башкарма директоры Татьяна Камалетдинова һәм Ак Барс Банкының идарә җитәкчесе урынбасары Радик Сәләхетдинов катнаша. Тиздән мәктәп укучылары MasterCard PayPass® банк карталары ярдәмендә мәктәп ашханәсендә, җәмәгать транспортында һ.б урыннарда түли алачак. Моннан тыш бу яңа карталар мәктәп территориясенә керү өчен электрон пропуск буларак та хезмәт итә. "Укучы картасы" ике нөсхәдә бирелә. Аларның берсе - ата-аналар, берсе балалар өчен. Түбән сыйныфларда укучылар өчен комплектка укучының исем фамилиясе һәм сыйныфы күрсәтелгән махсус беләзекләр дә керә. Банк карталарына акчаны өйдән чыкмый гына интернет аша да күчерергә мөмкин. Әлегә кадәр мондый карталар Яшел Үзән шәһәренең 12 мәктәбендә уңышлы файдаланылып килде.