Велосипед каракларын тотканнар

Казанда велосипед сезоны ачылганнан бирле, аларны урлау очраклары да күренә башлады. Әле күптән түгел генә полиция хезмәткәрләренә Киров районында яшәүче берәү сарае яныннан өч велосипедын урлаганнар, дип гариза тапшырган булган. Велосипедлар 20 мең сум тирәсе торган. Тикшерү эшләре үткәргәннән соң, тиз арада велосипед каракларының эзләренә төшкәннәр. Шул районда бер урамда велосипедларда баручы шикле өч кешене тоткарлаганнар. "Тимер ат"лары нәкъ урланган велосипедларны хәтерләткән. Ахырдан хуҗасы үзенең велосипедларын танып та алган. Әлеге кешеләрне сак астына алганнар, аларга карата җинаять эше кузгатылган.