Йөк машиналарына язгы чикләүләр

Бүгеннән йөк машиналарын башкалага кертми башлыйлар. Инде ел саен гадәткә кергән бу чикләүләр 15 нче апрельдән 14 нче майга кадәр дәвам итәчәк. Аның максаты - асфальт юлларны таушалудан саклап калу. Кагыйдәләрне бозган өчен штраф күләме шактый зур. Быел ул рәсми затлар өчен 15-20 мең, ә юридик затлар өчен 400-500 мең сумны тәшкил итә. 4-6 айга машина йөртү таныклыгыннан да мәхрүм итәргә мөмкиннәр. Бары азык-төлек, терлек, дару препаратлары, орлык фонды, ашлама ташый торган транспорт чаралары, Халыкара йөк ташый торган машиналарга гына шәһәргә керү тыелмаячак. Йөк күчерергә теләүче компанияләргә исә махсус рөхсәт кәгазе алу мөмкинлеге тудырылган.