Йокыны алдан «җыеп» буламы? Галимнәр көтелмәгән нәтиҗәгә килгән

Орегон сәламәтлек һәм фән университеты белгечләре эре гомуммилли мәгълүмат базасын анализлаган. Шулай ук алар Америкада уртача гомер озынлыгын 2019–2025 еллар аралыгындагы CDC сораштырулары нәтиҗәләре белән чагыштырганнар һәм шундый нәтиҗәгә килгәннәр: диета, физик активлык яки социаль факторларга караганда, йокының сыйфаты һәм дәвамлылыгы гомер озынлыгына күпкә көчлерәк йогынты ясый.

Тикшеренү кысаларында җиде сәгатьтән артык йокы озынлыгы җитәрлек дип саналган. Авторлар билгеләп үткәнчә, йокы җитмәүнең үлемгә йогынтысы элегрәк тә тасвирланган булган, әмма яңа тикшеренүдә беренче тапкыр йокы күләме һәм гомер озынлыгы арасындагы тотрыклы бәйлелекне эзлекле рәвештә ачыклый алганнар.

Белгечләр фикеренә караганда, төнге ял йөрәк-кан тамырлары һәм иммун системасының нормаль эшләвен тәэмин итә. Моннан тыш, йокы когнитив функцияләрне саклауга ярдәм итә. Әлеге системалар эшчәнлегендәге начар үзгәрешләр авырулар һәм бәхетсезлек очраклары үсеше куркынычын арттыра, нәтиҗәдә үлемгә дә китерергә мөмкин.

Сүз уңаеннан, алда авыр эш көннәре булса, белгечләр «энергия банкы»н тутырып куюны кирәк дип саный, ягъни ял көннәрендә яхшылап йокларга киңәш итә. Артык йокы сәгатьләре организмга булачак катлаулы эшләрне кичерергә һәм ресурс халәтендә калырга ярдәм итәчәк.

Бердәнбер шарт: бу лайфхак хроник йокысызлык очрагында эшләмәячәк. Моның өчен башта тотрыклы рәвештә көн саен 7–8 сәгать йоклау кирәк, югыйсә «энергия банкы» тулыланмаячак.