Мәктәп укучысы әнисенең җыелган акчасын мошенникларга күчергән

Полициягә мошенниклык турында гариза белән аның әнисе мөрәҗәгать иткән. Ул банк счетыннан шактый зур суммадагы акча югалуын хәбәр иткән. Укучы кыз онлайн-платформада уйнау белән мавыккан һәм моның өчен әнисенең кәрәзле телефонын сораган. Уен барышында аның белән мессенджерда билгесез кешеләр элемтәгә кергән һәм роблакслар вәгъдә иткәннәр, ә моның өчен берничә биремне үтәргә – банк кушымтасына кереп, күчерүләрне башкарырга кушканнар. Мошенниклар сүзен тыңлап кыз әнисе картасындагы бөтен акчаларны билгесез счетларга күчергән. Хәзерге вакытта әлеге факт буенча Россия Җинаять кодексының  «Мошенниклык» маддәсе буенча җинаять эше кузгатылган. Мондый хәлләрне булдырмас өчен Татарстан Республикасы буенча Эчке эшләр министрлыгы кисәтә: — җинаять корбаны булмас өчен, таныш булмаган кешеләрдән килгән барлык мәгълүматны тикшерегез; — үзегезнең банк карталары һәм счетлары турында таныш булмаган кешеләргә хәбәр итмәгез; — уяу булыгыз, мошенникларның хәйләләренә бирешмәгез; — һич кенә дә мошенниклар артыннан бармагыз, билгесез счетларга акча күчермәгез; — балаларыгызны һәм өлкән яшьтәге гаилә әгъзаларын киберкуркынычсызлыкка өйрәтегез. Әгәр сез җинаять корбаны булсагыз, кичекмәстән полициягә 02, 112 телефоннары буенча хәбәр итегез.

Хәзер Татарстанда Республика Рәисе Рөстәм Миңнеханов кушуы буенча, финанс мошенникларга каршы тору буенча кампания игълан ителде. Эш шунда ки, ел башыннан алар халыкның миллиард 300 миллион сум акчаcын урлаган. 

Идел буе төбәкләре арасында мондый төр җинаятьләрнең күпчелеге безнең Республикада кылына. Макетлар Казанның 23 урынында, шулай ук район-авылларда урнаштырылачак. Акциянең максаты - кешеләрнең игътибарын арттыру.