Татарстан табиблары аюдан качып аягын сындырган хатынны аякка бастырган

Катлаулы операцияләрдән соң пациент икенче көнне үк ходуноклар белән йөри башлаган.

Фаҗига хатын-кызның хезмәттәшләре белән командировкада вакытында булган. Аю алар яшәгән йортларга үтеп керергә тырышкан, ишек-тәрәзәләрне ваткан. Хатынның ире ерткычның игътибарын үзенә юнәлткән, әмма үзе һәлак булган. Хатын-кыз исә аюдан котылу өчен икенче кат тәрәзәсеннән сикергән һәм терсәк сөяген авыр имгәткән.

Башта аңа ашыгыч ярдәм күрсәтелгән. Аннары аягын тулысынча торгызу өчен Татарстан табибларына мөрәҗәгать иткәннәр. Республика клиник хастаханәсе травматологларына өч этаплы операция ясарга туры килгән.

Травматология бүлеге мөдире Гамил Гарифуллов аңлатканча, табиблар башта Илизаров аппаратын урнаштырган, аннары сынган сөякләрне махсус пластина һәм винтлар ярдәмендә беркеткән. Шулай ук җәрәхәт нәтиҗәсендә барлыкка килгән сөяк дефектын да төзәтергә туры килгән.

Дүрт сәгать дәвам иткән операция уңышлы узган. Икенче көнне үк хатын-кыз аягына баскан һәм ходуноклар ярдәмендә йөри башлаган. Табиблар бәяләвенчә, аның тулысынча тернәкләнүе ярты елга кадәр сузылырга мөмкин.