Казанның Вишневский урамында 11 кешене бәрдергән такси йөртүчесе Евгений Крусев табиб — психиатр-наркологның ялган медицина тикшерүе белешмәсен кулланган. Бу хакта Татарстан буенча Эчке эшләр министрлыгының матбугат хезмәте хәбәр итә.
Әйтик, җинаять эшен тикшерү барышында хокук саклаучылар шикләнелүче Крусевның ялган белешмә кулланганлыгын ачыклаган. Әлеге факт буенча Россия Җинаять Кодексының 327 маддәсе буенча җинаять эше кузгатылган ("ялган документлар ясау, яки аны сатып алу"). Бу маддә буенча максималь җәза — 2 елга кадәр иректән мәхрүм итү.
Ведомствода хәзерге вакытта тикшерү зыян күрүчеләргә китерелгән зыянның авырлыгы буенча экспертиза нәтиҗәләрен алырга тиеш, дип ачыклык керттеләр.
Исегезгә төшерәбез, авария дүшәмбе көнне көндез Вишневский урамындагы җәмәгать транспорты тукталышы янында килеп чыккан. Машина йөртүче, пассажирларны төшерү өчен туктаган автобусны урап узарга тырышып, автобустан чыккан җәяүлеләрне бәрдергән. Соңгы мәгълүматларга караганда, Казан хастаханәләрендә 6 кеше кала, алар арасында бала да бар. Барлык зыян күрүчеләр дә тотрыклы хәлдә.
Сишәмбе көнне билгеле булганча, экспертиза Крусевтан алынган биоматериалда наркотик эзләре булуын күрсәткән. Шул ук көнне әлеге факт буенча машина йөртүчене 15 тәүлеккә кулга алганнар. Крусев моннан бер ай элек наркотик куллануын таныган. Шулай ук аңа карата Россия Җинаять кодексының 264 маддәсе буенча («Юл хәрәкәте кагыйдәләрен бозу») җинаять эше кузгатылган.
Кызыклы яңалыкларны күзәтеп бару өчен Телеграм-каналга кушылыгыз.
Комментарийлар