Баянчы Рөстәм Вәлиевны искә алу кичәсе узачак

20 мартта MOÑ театр мәйданында танылган баянчы Рөстәм Вәлиевка багышланган "АККОМПАНИАТОР" дип исемләнгән кичә узачак.

Илһам Шакиров, Әлфия Авзалова, Зөһрә Сәхәбиева, Зәйнәп Фәрхетдиновалар җырлаган иске язмаларга игътибар итсәгез, яннарында куе бөдрә чәчле, кара мыеклы, чая карашлы бер гармунчы булыр. Рөстәм Вәлиев ул. Илһам абыйның гаҗәп тавышын ассызыклый торган аккомпаниатор. Әлфия апаның сәхнә уенына чын күңелдән кушыла торган сәхнәдәш, иҗатташ, партнер. Нинди булган ул, нинди уйлар белән янган, музыка дөньясында нинди ачышлар ясаган — 20нче март көнне кич шулар турында сөйләшербез. Үзе берәмтекләп җыеп калдырган музыкаль ядкарьләрне барларбыз, үзгәреш чоры елъязмалары белән танышырбыз, – дип хәбәр итә чараның оештыручылары.

"АККОМПАНИАТОР"ның иҗат төркеме – баянчының улы, танылган музыкант Ислам Вәлиев, шагыйрә Йолдыз Миңнуллина, перформер Нурбәк Батулла, музыкант Ильяс Фәрхуллин, рәссам Зөлфия Илькаева һәм арт-куратор Алёна Батулла.

Кичә ике телдә барачак, башлана 19 сәгатьтә. 

Проект мәдәни инициативалар Президент фонды ярдәмендә гамәлгә куела.