#Мәдәният 10 декабрь 2024, 17:43

Салават Фәтхетдинов шәкертләре турында: «Яхшыларын мактап торам, начарларын телгә дә алмыйм...»

10 декабрь 2024, 17:43

Муса Җәлил исемендәге Татар дәүләт опера һәм балет театрында Казан дәүләт мәдәният институтының юбилеена багышланган концерт узды. Мәдәният институты 55 ел дәверендә мәдәният һәм сәнгать өлкәсендә белгечләр әзерли.

Скопировать ссылку

Салават Фәтхетдинов шәкертләре турында: «Яхшыларын мактап торам, начарларын телгә дә алмыйм...»

билей кичәсе Россиядә геройлар көне белән бер көнгә туры килде. Ике бәйрәмне берләштереп, институт «Үз эшләребез белән Ватанны данлыйбыз» дип исемләнгән хәйрия концерты үткәрде. Җыелган акчалар махсус хәрби операция зонасындагы хәрбиләргә җибәреләчәк.

Мәдәният институтын Татарстан Республикасы Премьер-министры урынбасары Ләйлә Фазлыева да котлады.

«Мәдәният институтын 55 яшьлеге белән тәбрик итәм. Әлбәттә, илебез геройларын да бәйрәмнәре белән котлыйм. Россия һәм Татарстан үз геройлары, Ватан, тынычлык өчен гомерләрен бирүчеләр белән горурлана. Бүген дә Татарстан геройлары алгы сызыкта. Алар Бөек Ватан сугышында катнашкан ата-бабайларның традициясен дәвам итә. Без ветераннарыбыз белән дә горурланабыз», – дип сөйләде ул һәм студентларга, укытучыларга теләкләрен җиткерде.

ТР Дәүләт Советы Рәисе урынбасары Марат Әхмәтов институтта эшләүчеләргә рәхмәт сүзләрен җиткерде.

«Институт ярты гасырдан артык илебезгә хезмәт итә. Сез мәдәниятебезнең киләчәге өчен нык терәгебез. Бик көчле педагогик коллектив тупланган. Киләчәктә дә матур зур гаилә булып, илне-көнне сөендереп яшик. Сәхнә артында да Сабан туе хәтле халык. Алар барысы да мәдәният интситутының бер өлеше», – диде ул.

Институт ректоры Роза Әхмәдиева коллективка рәхмәт сүзләрен әйтте.

«5 ел элек бу сәхнәдә 50 еллыкны билгеләп үткән идек. Бүгенге көндә зур проектларны алып барабыз, безнең студентлар чил ил мәйданнарында да билгеле. Без 55 ел Ватанга хезмәт итәбез. Бүген безнең геройларыбыз алдынгы сызыкта. Безнең максат - аларга ярдәм күрсәтү», – диде ул.

Концертны мәдәният институты студентлары һәм укытучылары чыгышлары бизәде. Мәдәният институтының йөзләре, атаклы мөгаллимнәр Салават Фәтхетдинов һәм Винера Ганиева белән дә җәһәт кенә сөйләшеп алдык.

Татарстанның халык артисты Салават Фәтхетдинов яшьләрне иҗатка тартуны бурычларының берсе дип атады.

- Безнең эшебез шул. Минем курста укыган егетләр-кызлар барысы да диярлек зур сәхнәне тоталар. Һәрберсе үз урынында лидер. Мин аларга әйтәсен әйттем, аңлатасын аңлаттым. Кайберләренә гомерлеккә онытылмаслык итеп әйттем. Яхшыларын мактап торам, начарларын телгә дә алмыйм, - ди Салават Фәтхетдинов.

Шулай ук мәдәният институты мөгаллиме Татарстанның халык артисты Винера Ганиева исә, югары уку йортын тәмамлаган шәкертләре белән хәбәрдә тора.

- Шушы 55 елның 28ен мин җырчылар әзерли торган кафедрада эшлим. Безнең уку йортын тәмамлаган шәкертләребез белән горурланабыз. Аларның 40ка якыны дәүләт бүләкләренә лаек. Татарстанның атказанган, халык артистлары. Бу барлык укытучыларның уртак хезмәте. Опера һәм балет театрында 42 ел хезмәт итәм. Шул тәҗрибәмне укучыларга тапшырам, алардан зәвыклы, затлы җырчылар үстерәсе килә. Сәхнәгә чыккан кеше тамашачылар белән аралаша, һөнәребез - бик җитди, чөнки халыкка тәрбия дә бирергә тиешбез.

- Күптән мәдәният институтын тәмамлаган шәкертләрегезгә дә ярдәм итәсез. Сез аларның тормышына да битараф түгел. Ни өчен?

- Шәкертләремә хәер-фатыйхамны бирәм. Концерт программаларын әзерләгәндә еш кына минем белән киңәшләшәләр. Тәҗрибәмә таянып аларга ярдәм итәргә тырышам. Ничек инде битараф булсың? Алар бит минем җимешләрем. Зәвыклы, затлы репертуар туплагыз, сәхнәдә үзегезне итәгатьле тотыгыз дип гел өндәп торам. Мин үзем дә гомер буе укытучыларым белән элемтәдә тордым. Көллияттә - Клавдия Захаровна Щербинина, консерваториядә - Валентина Андреевна Лазько булды. Без һәр чыгарылыш группаларында элемтәне саклыйбыз. Туйларга, юбилейларга, бәби ашларына йөрешәбез. Бер тату гаилә булып яшибез. “Бер-берегезне ташлашмагыз. Гел элемтәдә булыгыз”,- дип өндим.