Татарстанның бизнес-фәрештәләре күзгә күренми икән

Фәрештә канаты

Борынгы грек галиме, инженеры Архимед замандашларының башына да килә алмаган бөек ачышлар ясаган. Аның байлыгы да, заводлары да булмаган. Әгәр дәүләт һәм хәйриячеләр ачышларын гамәлгә ашырырга булышмаса, Архимед исеме дә тарихта калмас, хыялый бер бәндә сыйфатында онытылыр иде.

Архимед кебек күңелләрендә ачыш-идеяләр белән кайнаучы хыялыйлар бүген дә бар. Биредә мәңгелек сорау килеп баса. Идеяне ничек гамәлгә ашырасы? Татарстанның үзенең бизнес-фәрештәләре бармы? Хөкүмәт йортында узган брифингта “Шәһри Казан” газетасы исеменнән шушы сорауны Татарстанның инвестиция-венчур фонды директоры Дамир Галиевка бирдем.

– Татарстанның венчур инвесторлары да һәм бизнес-фәрештәләре дә бар. Бу финанс эшчәнлеге, шунлыктан, ачык мәгълүмат түгел. Кемдер юридик зат буларак, кемдер исемен күрсәтмичә ярдәм итә. Узган ел республиканың венчур инвесторлары 32 проектка 1,5 миллиард сум инвестиция кертте. Бизнес-фәрештәләр 450 миллион сум күчерде, – дип җавап бирде Дамир Галиев.

Венчур сүзе “тәвәккәллек” мәгънәсен аңлата. Юридик һәм физик затларның ахыры нәтиҗәле яки уңышсыз да тәмамлану ихтималындагы идея-проектларга тәвәккәлләп акча кертүләре  “венчур инвестиция” була.

Мөмкинлекләр мәйданы

“Казан Экспо”да узачак Россия венчур форумы, Дамир Галиев әйткәнчә, идея-проектларны гамәлгә ашыру өчен мөмкинлекләр мәйданы. Форумда Россия төбәкләреннән, Австрия, Франция, Берләшкән Гарәб Әмирлекләре, Үзбәкстан, Бахрейн, гомумән, 25 илдән 5 мең кеше катнаша. Дәүләт хакимияте структуралары, инвесторлар, бизнес вәкилләре төрле тармакларда инновацион проектларны үстерү турында фикер алышачак.  

Беренче киңәшмә Иннополис фән шәһәрендә уза. Анда кунаклар “Иннополис” үзгә икътисади зонасының компания-резиденты, ягъни, шунда эшчәнлек алып баручы предприятие белән таныша.

Пленар утырыш “Казан Экспо” халыкара күргәзмәләр үзәгендә 10 апрельгә билгеләнгән. Татарстан Рәисе Рөстәм Миңнеханов, Россиянең фән һәм югары белем министры Валерий Фальков, Россиянең икътисади үсеш министрының беренче урынбасары Максим Колесников, фәнни-технологик өлкәдә кече формадагы предприятиеләрне үстерү фондының генераль директоры Сергей Поляков катнашыр, дип көтелә.

Татарстан Рәисе Рөстәм Миңнеханов республикада инновацион технологияләрне үстерүнең гаять тә зур әһәмияткә ия булганлыгын искәртеп тора. Форумның файдалы ягы: гамәлгә ашырыла башлаган проектларга ярдәм белән беррәттән яңа идеяләргә теләктәшлек мәсьәләсе дә алга куела.

– Форумда 8 ил үзенең 283 идеясен тәкъдим итә. Идеяләрне кулланышка алу яки уртак хезмәттәшлектә гамәлгә ашыру шартлары өйрәнеләчәк,– диде “Идея” инновация-җитештерү технопаркы” ябык акционерлык җәмгыяте генераль директоры Диас Сафин.

Форум кысаларында инновацион технологияләр күргәзмәсе эшли.

Белеп-күреп кал

Югары уку йортлары студентлары форумга махсус чакырулы.

– Егетләр һәм кызлар үзләренең идеяләрен ничек гамәлгә ашырып булганлыгын күреп-белеп кала. Студентлар өчен эш урыннары ярминкәсе дә оештырыла, – диде Дамир Галиев.

Кунаклар өчен Казанның тарихи урыннарына экскурсияләр, хәтта, спорт бәйгеләре дә оештырыла.