Актаныш мәктәбенә җиңү ничек бирелгән?

Бәйгенең төп максаты булып туган телдә белем бирү учреждениеләре эшчәнлеген популярлаштыру, хезмәтләрен бәяләү, матди-техник һәм укыту-методик базасын ныгыту торган. Чуракай авылы мәктәбе директоры Рамил Зәмигнур улы Сәләхов әйтүенчә, аларга бу җиңү җиңел бирелгән. «Бәйгенең исеменнән үк күренгәнчә, таләпләре практик иде. Без, чи татар Актаныш мәктәбе өчен бик җиңел җиңү булды бу. Ничек бар – шулай конкурска гариза бирдек”, – диде Рамил Зәмигнурович.

Гариза белән берлектә соңгы өч елдагы мәктәпнең күрсәткечләре, ирешкән уңышлары, укытучыларның һөнәри конкурс, укучыларның олимпиада, фәнни-гамәли конференцияләрдә, сәнгатьтә ирешкән уңышларын раслаучы документлар җибәрелгән. Шуларга нигезләнеп, республика буенча татар телендә белем бирүче 30 мәктәп сайлап алынган.

Шушы 30 мәктәп – ярымфиналистлар була. Аларга Татарстан республикасы фән һәм мәгариф министрлыгы белгечләре барып, аларның эшчәнлеге, өч еллык барлык документлары, белем бирү программасы, нигезләмәләр белән танышып кайталар Дәресләр тыңлана, укучылар белән әңгәмә үткәрелә. Бу этапта 20 мәктәп сайлап алына. Болары инде абсолют җиңүчеләр. Татарстан Дәүләт советында Татарстан республикасы президенты каршында оешкан туган телләрне саклау комиссиясе рәисе Марат Готыф улы һәм республикабызның фән һәм мәгариф министры Илсур Гәрәй улы шушы җиңүче мәктәп һәм балалар бакчасы мөдирләрен тәбрикләп, 500 мең сумлык премия тапшырыла.

– Быел безнең мәктәп «Үткәне юкның киләчәге юк» дип исемләнгән проект эше белән катнашып, «Татнефть” гранты иясе дә булган иде. Мәктәбебезгә 123 мең сумлык җиһазлар, өстәлләр кайтты. Шулай ук ул акчаларга музейны яңа бүлмәгә күчердек, – дип сөйли Рамил Сәләхов. – Ә бу бәйгенең гранты акчасы исә укучыларда туган телебезне саклау, аны өйрәнү; милли гореф-гадәтләребезгә карата мәхәббәт тәрбияләү юнәлешендә максатчан тотылырга тиеш. Акчаларны дәресләрне тагы да кызыклырак итү, заман таләпләренә ярашлы булсын өчен кабинетларга проекторлар, укучыларга төрле бәйрәм, дәрестән тыш чаралар үткәргәндә киеп чыгыш ясарга милли киемнәр тектерү, татар телендә стендлар һәм башка ярдәмлекләргә тотарга планлаштырабыз.

Регина Габдрахманова