Казанда миллион сумлык робот-укытучы дәрес бирә башлады

2012 елда Президент Рөстәм Миңнеханов инициативасы белән ачылган лицейда Татарстаннан, башка чит төбәкләрдән 296 сәләтле бала белем ала. Аларны фәнгә тарту, дәресләрне үзенчәлекле итү максатыннан, лицейда әнә шундый робот укытучыны җәлеп итәргә булганнар. Яңа укытучының исеме Ева. Ул популяр "Валли" мультфильмындагы персонажга ошатып ясалган, 85 сантиметр озынлыктагы, зәңгәр күзле кыз. Ева укытучы белән берлектә 7-9нче сыйныф укучыларын информатика, химия, математика, физика фәннәреннән укыта. Дәресләрне рус телендә алып бара.

Ева беренче дәресен үткәрергә өлгергән дә инде. 5 октябрь көнне информатика фәненнән дәрес биргән. Укучылар яңа укытучыдан канәгать. Дөрес, мондый кырыс укытучы белән күчереп булмый. Робот видеокамера ярдәмендә һәр укучыны күзәтә. Әлеге робот Магнитогорск шәһәрендәге "Андроидная техника" фәнни- җитештерү компаниесендә әзерләнгән. Бәясе якынча 1 миллион сум .

Евага иптәшкә тагын ике робот булыр дип көтелә. Робот әлегә дәресне укытучы белән берлектә генә алып бара. Робот укытучы белән Wi-Fi челтәре аша идарә итәргә була. Ул укучыларга дәрес аңлата, сорауларына җавап бирә. Робот сөйлиячәк программаны лицей укытучылары үзләре төзиләр һәм Еваның хәтеренә кертәләр. Лицейның директоры Тимербулат Самерханов киләчәкне IT- технологияләрсез күз алына да китереп булмый, ди.

Сәләтле балаларны дәресләргә җәлеп итү өчен, укучылар фән белән ныклап шөгыльләнсен дисәң, барлык шартларны тудырырга кирәк. Робот- укытучылар дәресләрне кызыклы итәргә ярдәм итә. Әмма, ничек кенә булмасын, робот тере кешене алыштыра алмый. Бөтен җирдә компьютер, техника заманы булса да, кул эше югары бәяләнә. Коры белемнән тыш, мәктәп диюгә сыйныфташлар белән аралашу, үзенә аерым бер мохит күз алдына килә. Кешене кеше укытырга тиеш, дип саныйм, ди ул.

Василий Иванов фотолары