Инсульт турында укымый калмагыз: “алтын” 4 сәгать, яки инсульт сугуның өч билгесе

Секунд саен меңләгән нейроннар үлә бу очракта! Димәк, инсульт нәтиҗәсе ай-һай аянычлы булырга мөмкин. 

Статистикага күз салсак, дөньяда һәр дүртенче кешегә инсульт яный. Куркыныч төркемендә үзең, йә якыннарың-дусларың булырга мөмкин, ди табиблар. Шуңа күрә аның билгеләреннән хәбәрдарлык аеруча мөһим. Чөнки вакыт бу очракта гаять зур роль уйный. Инсульттан соң белгечләр кулына никадәр тизрәк килеп эләксәң, сәламәтлегеңә зыян да шул кадәр кимрәк булачак.

Түбәндәге өч билге инсульт сугу күрсәткече булып тора:
-    бер як аяк яки кулда хәлсезлек; 
-    бит ассиметриясе, 
-    сөйләм бозылуы.
Табиб-невролог, МКДЦның баш миендә кан әйләнеше кискен бозылган авырулар өчен неврология бүлеге мөдире Тимур Дёмин сүзләренчә, шушы өч билге дә күзәтелсә, 90 проценттан артык очракта инсульт булган дигән сүз. Ике билге – 80 процент, бер генә билгенең күзәтелүе 50-60 процент ихтималлык белән баш миендә кан әйләнеше бозылуы турында сөйли.
-    Инсульт сугуына шик туса, иң башта кешедән кулларын күтәрергә сорыйбыз. Бер кулны күтәргән хәлдә тотып тора алмау баш мие зарарлануның беренче билгесе булып тора. Аннары кешегә елмаерга кушабыз – иреннәр кыегайса, бу икенче билге. Шуннан соң исемен сорап, телне чыгарып күрсәтергә кушабыз – кеше сезне аңламый, яки аңлап та теле әйләнми икән, монысы – өченче билге, - дип аңлатты невролог. 

Бүген Россиядә ел саен 600 мең инсульт теркәлә,  шуларның 19 меңе – Татарстанда. Инсульт кичерүчеләрнең 8 проценты гына бер ел эчендә элеккеге халәтенә кире кайта, гомерлеккә инвалид калучылар күп.