Гөлназ Сәфәрова: «Бәлки, тагын бер тапкыр әни булырмын»

– Сәхнәгә төрле кызыклы образларда чыгасыз. Энәсеннән җебенә кадәр уйланылган киемнәрдә генә чыгыш ясыйсыз. Бу мөһимме?
– Бик дөрес әйттегез. Беркайчан да сәхнәгә теләсә ничек киенеп чыкканым булмады. Тышкы кыяфәт камил булырга тиеш. Үземне югары дәрәҗәдәге алып баручы буларак тәкъдим итсәм, бөтен таләпләрне дә истә тоту зарур. Караңгы бүлмәдә бизәнеп утыручы кайбер артистларга шаккатам. Бу эшне осталар башкарырга тиеш. Әйе, өстәмә чыгым, тик бу бит үзеңә тотыла торган акча. Минем дә беренче вакытларда эшләгән акчам күлмәгемнең бәясен дә акламый иде. 40-50 мең сумга күлмәк тектереп, 10 меңгә чыгыш ясаганым булды. Үзегез санап карагыз инде.

– Җырчылар арасында дусларыгыз бармы?
– Юктыр. Элек гастрольләргә бергә йөрдек. Һәрвакыт дүртәү булдык: Ландыш Нигъмәтҗанова, Иркә, Ләйсән Гимаева һәм мин. Фикерләребез, холыкларыбыз туры килгәнгә дуслаштык. Иркәнең кызыл машинасына төялеп, бергә яшәп, гастрольләрдә йөрдек. Безне эстрада берләштерде. Хәзер дә аралашып торабыз. Тик элеккеге кебек очрашулар юк инде.

– Элек артистларның концертларын да алып бара идегез. Дуслык буенча ташлама сораучылар булдымы? Мондый адымга ничек карыйсыз?
– Дусларга ярдәм итмичә булмый. Бөтен дөньяны акчага корырга кирәкми. Хөрмәт иткән кешеләреңә булышмыйча мөмкин түгел. Бушка сценарий язган, концерт алып барган вакытлар җитәрлек. Чын күңелдән яхшылык эшләсәң, ул, һичшиксез, әйләнеп кайтачак.

– Сез бик көчле хатын-кыз. Ир-атлар андыйлардан курка дип тә әйтәләр. Сезнең андый хәлне күзәткәнегез бармы?
– “Бу хатын-кыз үзе дә барысын да булдыра”, - дип уйлап, якын килергә батырлыгы җитмәүчеләр күп. Эш, бизнес өлкәсендә дә синнән куркалар. Хатын-кыз булуыңны белеп, “батырырга” да тырышалар әле. “Ир-атлар проектны яхшырак эшли”, – дигән бүленеш бар. Мөселман хатын-кызы буларак, ир-ат беренче урында булырга тиеш дип уйлыйм. Беренчелеккә теләгем дә юк.

– Тормыштан мисал китерә аласызмы?
 – Бер егет белән мөнәсәбәтләребез бер-беребезгә юл бирә алмаудан тәмамланды. Бу хәлне бик авыр кичердем. Яратсам, бер генә кешене яратам. Ул да бик көчле шәхес иде. Хәзер үземнең элеккеге хаталарымны таныдым. Дилбегәдән алда чабарга кирәк түгел икән.

– Егетләр игътибарына сусамагансыздыр. Җитди мөнәсәбәтләрегез күп булдымы?
 – Очрашулар күп булды. Егетләр белән дустанә мөнәсәбәтләр урнаша иде. Хәтта кызлары булса да, бергә кинога йөрдек. Җитди мөнәсәбәтләр исә күп булмады.

– Дус егетләрегезнең сөйгән ярлары бик нык көнләшкәндер...
– Хәзер дә ир-ат дусларым күп. Аларның тормыш иптәшләре, гаиләләре бар. Кайбер хатын-кызлар аңламады: “Ничек син аңа шалтыратасың? Ник язасың?” – дип әйттеләр. Еллар узу белән, бернинди якын мөнәсәбәтләрнең исе дә килмәвенә үзләре дә инанды. Мин күп кенә дусларымны, ир-ат итеп кабул итмим. Көнләшкән хатын-кызларны жәлләп тә куям. Кеше мөнәсәбәтләрен бозасым килми. Балам, ирем бар, нинди очрашулар турында сүз булсын? 

– Ирегез сезнең номерыгызны Булат Бәйрәмовтан бер шешә коньякка сатып алган. Очсыз түгелме?
– Очсыз. Ленар миңа бик күп язды, җавап бирмичә йөрдем. Ленар халык арасында йөрергә, артык игътибарны яратмый. Тик ул кешенең эчке дөньясын беренче күрешүдә үк сизеп ала. Ленар – киңәш сандыгым.

– Фамилиягезне алыштырдыгызмы?
 – Юк. Иремнең фамилиясе – Мухин. Ул – Марат Мухинның (танылган композитор, аранжировка остасы – Ред.) абыйсы. Ирем шоу-бизнес өлкәсеннән еракта. Шәхси эшмәкәрлек белән шөгыльләнә. Фамилия алыштырмаганга ирем каршы килмәде. Гомумән, ул барысына да бик лояль карый. Гөлназ Сәфәрова исемен таныту өчен бик күп көч куелды. Шуңа да бу фамилия белән хушлашасым килмәде. Улым иремнең фамилиясен йөртә.

– Ир-атта иң мөһим сыйфат нәрсә?
– Ир-ат акыллы, аз сүзле булырга тиеш. Ул – эшчән, тормыш алып бара алырдай кеше. “Хатын икенче урында булырга тиеш”, – диләр. Ул анда булачак та, әгәр ир тормыш йөген тартып бара алса. Әйдәгез ир-атларны геройга тиңләп, хатын-кызларны бетереп ташламыйк әле. 

– “Айданның кечкенә вакытын күрә алмадым”, – дип әйткәнсез. Үкенечләр калмадымы?
- Мин эшләгәнемне тоймадым да, ул үзеннән-үзе барды. Хәзер үз өстемә күпкә әзрәк эш алам, тормышның һәр мизгеленең тәмен тоеп, белеп яшисе килә.

– Икенче тапкыр әни буласыгыз киләме?
– “Әлегә белмим”, – дип әйтеп йөрдем. Вакыт бара бит. Тик үземне беркайчан да яшькә һәм вакытка бәйләмим. Әзер булсам, Ходай насыйп итсә, бәлки, тагын бер тапкыр әни булырмын.