Машинаны газга көйләгән өчен акча кайчан түлиләр?

Татарстан Министрлар Кабинеты карары белән, быел машинасын газ ягулыгына күчергән юридик, физик затларга, оешмаларга әлеге хезмәтне компенса­цияләү турында карар кабул ителде. Субсидия 2013-2023 елларга исәпләнгән «Татарстанда газмотор ягулыгы базарын үстерү» дәүләт программасы кысаларында бүлеп бирелә. Карар нигезендә, машинаның төренә карап, чыгымнар компенсацияләнәчәк. Әйтик, 3,5 тоннага кадәр автомобиле булганнарга 30 процент субсидия каралган. Субсидия акчасын алу өчен, «Татарстан Республикасы кече һәм урта эшмәкәрлеккә ярдәм күрсәтү һәм үстерү программаларын тормышка ашыру үзәге»нә гариза тапшырырга кирәк. Субсидия транспорт чарасын бары 2016 елның 1 мартыннан газ ягулыгына күчергәннәргә генә каралган.