Барыбыз да Мүлмәгә: көрәшчеләр хәйрия концерты куярга планлаштыра

Тик бу юлы көрәшчеләр калын келәм җәелгән мәйданда бил алышмый. Аларны күптән түгел генә заманча төзекләндерелгән мәдәният йортының сәхнәсе көтә – чыгыш ясаячаклар.
– Татарстаннан махсус хәрби операциягә китүче көрәшче егетләребез дә шактый. Аларга багышлап хәйрия концерты оештырырга уйладык. Без – көрәшчеләр, дигән данны югары күтәреп, бергәләшеп хәлдән килгәнчә ярдәм итәргә исәп. Игезәгем Ленар Мүлмә авылы җирлеге башлыгы, мин авылда мәдәният йорты җтәкчесе булып эшлим. Оештыру эшләре безнең җилкәдә, сынатмабыз, дип уйлыйм. Биектау – атаклы көрәшчеләр төбәге, һәрберсенең исеме спортта алтын хәрефләр белән язылган, – ди Динар. 

Махсус ир-егетләребез бәйрәменә атап оештырылган хәйрия концертына Раил Нургалиев, Ранис Галимуллин, Ринат Гарифуллин, Мөнир Мәрданов, Илзар Закиров, Ильяс Халиковларның кайтуы көтелә. Көрәш ветераны Вил Усманов белән яшьлегендә көрәштә чыныккан Данир Сабировны да чакырырга ниятлиләр. Мүлмә егете Әбри Хәбриев та булыр кебек бу бәйрәмдә. Ә махсус кунак – Мамадыш, Теләче, Биектау районнарында хакимият башлыгы булып эшләгәндә көрәшебезне һәм көрәшчеләребезне үстерүгә зур өлеш керткән, бүген дә милли көрәшебзгә хәерхаклы булган Дәүләт Думасы депутаты Рөстәм Галиулла улы Кәлимуллин.

Чыгыш ясаучы көрәшчеләр исеме тагын да тулыланырга мөмкин, Кыскасы, бәйрәм хуҗалары чакыру җибәрсә, мөхтәрәм көрәшчеләр баш тартмагыз, сезне җыр мәйданы көтә.  Концертта катнашырга теләге булган егетләр Динар яки Ленар Зиннәтуллиннарга мөрәҗәгать итә ала.