Ильяс Халиков легендар спортчы Хәбил Бикташев турында җыр язган

“Хәбил абый – татар халкы өчен легендар шәхес. Бервакыт мәҗлестә үзенә: “Хәбил абый, сезнең турында җыр чыгару идеясе бар”, - дидем. “Әйдә, брат, яз”, - диде. Шулай итеп, Аллаһка шөкер, җыр язылды. Хәбил абый кебек кешеләр 100 елга бер тапкыр гына туа. Ул – Европа чемпионы, дөнья чемпионатында призлы урыннар алган шәхес. Татарны, үзебезнең халкыбызны үзебез мактамасак, зурламасак, безне кем зурлар? Бу – Хәбил абый турында беренче җыр икән. Минем өчен дә, аның өчен дә тарихи вакыйга”, - диде Ильяс Халиков.

Җырның сүзләрен Ильясның тормыш иптәше Нурфия Халикова, көен Ильяс үзе язган. “Сүзләренә игътибар итсәгез, шигырьнең һәрбер юлы Хәбил Бикташевның исем-фамилиясенә кергән хәрефләрдән башлана”, - ди җырчы.