КХЛ Көнчыгыш чикләрен киңәйтә

Континенталь хоккей лигасында киләсе сезонда Ерак Көнчыгышның тагын бер клубы чыгыш ясарга мөмкин. Сүз Приморье крае башкаласы Владивосток командасы хакында бара. «Спорт-экспресс» басмасы хәбәрләренә караганда, Владивосток клубы җитәкчелеге КХЛга керү өчен кирәкле документларны туплаган инде. Ил чемпионатында һәм НХЛда балкыган экс-хоккейчы Александр Могильный клубның генераль менеджеры булырга ризалык биргән. Команданың Континенталь хоккей лигасы таләпләренә җавап бирерлек составы әлегә формалашу этабында гына. Исемен дә бераз соңрак игълан итәчәкләр. Иң мөһиме: калада 7500 тамашачы сыйдырышлы боз сарае бар.