Кунакханәләр әзер, теплоходлар көйләнгән...

Универсиада авылында урнашачак спорт делегацияләреннән кала, уеннар вакытында шәһәрдә барлыгы 39319 кешене урнаштырырга кирәк. Шулар арасыннан 19 мең кеше - кунаклар һәм чит ил персоналы, 20 меңе - ярышларның куркынычсызлыгын тәэмин итәчәк көч структуралары вәкилләре, дип хәбәр итә «Казан- 2013» Башкарма дирекциясе» җитәкчесе урынбасары Оксана Тубман. Бу мәсь­әләне инде бүген үк хәл итә­­ләр, барысы да алдан планлаштырылган. Уеннарга килгән кешеләр кунакханәләрдә генә түгел, ә теплоходларда, хостел, шифаханә, җәйге сәламәт­лән­дерү лагерьларында, арендага алынган фатирларда да торачак. FISU гаиләсе һәм Универсиаданы оештыручылар «Мираж» һәм «Корстон» кунакханәләренә урнашса, Универсиаданың ачылу һәм ябылу тантаналарында катнашырга тиеш артистлар «Идел» һәм «Елга аръягы» сәламәт­ләндерү лагерьларына урнашачак. Чит­тән килгән жур­на­лист­лар Универсиада вакытында йөзә торган кунакханәләргә әйләнгән теплоходларда яшәр­гә тиеш. Социаль ипотека программасы буенча тө­зелгән 4 йорт Россия төбәкләреннән һәм чит илләрдән килгән 4,5 мең волонтерның тору урыны булыр дип ниятләнелә һ.б.
Казан мэры Илсур Метшин: «Универсиада вакытында һәрбер урын исәптә булачак. Барлык клиентларны югары дәрәҗәдәге кунакханәләрдә урнаштыра алмасак та, кунаклар һәм катнашучыларның, журналистлар, волонтерлар, персонал һәм башка төркем клиентларның яшәүләре өчен без уңай шартлар тудыра алабыз», - диде. Бу ту­рыда Казан мэриясе сайтында хәбәр ителә.