Милли спорт төрләренең дәрәҗәсе күтәрелерме?

Закон проектының авторы - РФ Дәүләт Думасы депутаты Илдар Гыйльметдинов, документны язгы сессия барышында беренче укылыштан уздырырга өметләнәбез, ди. «Язгы сессиядә аны беренче укылышта карарга тырышабыз. Ә калган укылышларны көзгә калдырабыз. Хәзер документны төбәкләргә тәкъдимнәр туплау өчен җибәрдек. Беренче укылыштан соң ул тагын төбәкләргә юлланачак. Бу вакыт сорый торган эш, көзге сессиядә документны кабул итәрбез дип ышанам», - ди депутат.
Илдар Гыйльметдинов милли спорт төрләренә бүген булган карашны гаделсезлек дип саный. Аның фикеренчә, хәзерге канунның хакыйкатькә туры килмәве спортның милли төрләре үсешенә комачаулый. Аларның күбесе бүген календарь планга кермәгән һәм дәүләт ярдәмен алмый.
«Гамәлдәге законда милли спорт төрләре бер генә төбәктә алып барыла, үстерелә торган төр итеп карала һәм милли спорт төрләре буенча Россия күләмендә спорт федерацияләре төзелә алмый дигән фикер ята. Ягъни бу милли спорт төрен аерым бер өлкә, республика кысаларыннан читкә чыгарып булмый дигәнне аңлата. Чынлыкта исә милли спорт төрләренең күбесе инде шактыйдан башка өлкәләргә таралган. Шул ук безнең көрәшне генә алыйк. Нигә әле ул спорт төре буенча Россиядә спорт федерациясе булмаска һәм нишләп ил күләмендәге Спорт министрлыгы аңа ярдәм итмәскә тиеш?» - ди депутат.
Илдар Гыйльметдинов бүген дөньядагы күп кенә спорт төрләренең милли спорт төрләреннән башлангыч алуына басым ясый: «Шул ук тхэквондоны гына алыйк. Кореяның милли спорт төре булган тхэквондо бүген Олимпия уеннары программасына керә торган спорт төренә әйләнде. Япониянең дзюдосы белән дә шундый ук хәл», - ди ул. Яңа закон проектында милли спорт төрләре башка спорт төрләре белән бер үк дәрәҗәгә куела.
Проект авторы депутатлар арасында да әлеге мәсьәләне аңларга теләмәүчеләр, милли спорт төрләрен элеккеге кысаларда гына калдыруны хуплаучылар булуын яшерми. Шулай да аек акыл җиңеп чыгып, документның кабул ителәчәгенә өметләнә.