Радик Сәлахов: "Дүрт машинаның дүртесен дә сатып җибәрдем"

Быел да батыр өстенлекне бирмәде ул. Егетләр көрәшнең соң тәмамлануыннан куркып тормадылар. Батырлар келәмдә аяк шуу сәбәпле, бил алышуны чирәмдә дәвам итте. Радик белән келәмгә чыкканчы әңгәмә кордык.

- Быел да Питрауда батыр каласыңмы? Кәеф ничек?
- Без һәрвакыт әзер торабыз. Кем көчлерәк икәнен келәм күрсәтә. Быел да батыр калырга тырышам.

- Төп көндәшләрең кем?
- Көндәшләр күп. Ранис Гыйләҗетдинов, Айнур Сыртаев, Айдар Алтынбаев һәм башкалар. Питрау көрәше - бәйрәмнәрдә бил алышуларның тәмамлаучысы. Бөтен көчле батырлар җыелган биредә. 

- Узган елны машина оттың, ә быел?
- Абсолют батырга - 500 мең. Тырышабыз инде.

- Нинди Сабан туйларда чыгыш ясадың? Сезон уңышлы булдымы?
- Быел сезон бик уңышлы булды. Дүрт җирдә батыр калдым, дүрт машина оттым. Хәзер монсына да тырышырга кирәк.

- Дүрт машинаны нишләтәсең? Тозлыйсыңмы?
- Бөтенесен дә сатып җибәрдем, шөкер. Аларны җыеп ятудан мәгънә юк. Тозлап булмый бит.

- Казахстанда дөнья чемпионатында катнашмадың бугай...
- Әләгеп булмады анысына. Татарча көрәш белән билбау көрәше бер көнгә туры килде. Кайсында көчлерәк шунсын сайладым. Бер машинаны Миңгәрдә оттым.

- Җанатарлар арасында кемнәр бар?
- Туганнарым, якыннарым монда. Көрәшче дусларым да көч биреп тора. Бу спорт төрен яратучылар, мине хөрмәт итүчеләр дә бирегә җыелды. Барысына рәхмәт.

- Питрауда көрәш бик соң тәмамлана. Мондый шартларда көрәшү авырмы?
- Әлбәттә, бүтән шартлар. Үзеңне кич белән көрәшергә рухи яктан әзерләргә кирәк. Авырлыклар бар, әмма ел саен катнашкан күнегә башладым. Чык тошкәнен истә тотып, махсус аяк киемендә келәмгә чыгасың. Кемгә нәрсә уңайлы. Узган елны көрәш иртәнге 4-5 тә тәмамланды.

Рудия Габидуллина фотосы